క్యాబ్ నడుపుతుండగా డ్రైవర్కు అకస్మాత్తుగా గుండెపోటు వచ్చింది. గమనించిన ప్రయాణికురాలు అప్రమత్తమై కారును నియంత్రించడానికి ప్రయత్నించింది. అదే సమయంలో అటుగా వెళ్తున్న సీఐ గమనించిన కారును నియంత్రించి డ్రైవర్కు సీపీఆర్ చేసి కాపాడేందుకు ప్రయత్నించారు. వెంటనే ఆస్పత్రికి తరలించినా అతడి ప్రాణాలు దక్కలేదు. ఈ ఘటన హైదరాబాద్లో చోటుచేసుకుంది.
మలక్‌పేట్‌ ధోబీగల్లీకి చెందిన కావలి శ్రీనివాస్(40) క్యాబ్ నడుపుతూ జీవనోపాధి పొందుతున్నాడు. గురువారం సాయంత్రం 5గంటల సమయంలో క్యాబ్‌లో ఓ కుటుంబాన్ని యాదగిరిగుట్టకు తీసుకెళ్తున్నాడు. ఓఆర్‌ఆర్‌ ఎగ్జిట్‌ దాటి కాస్త ముందుకెళ్లగానే శ్రీనివాస్‌కు గుండెనొప్పి రావడంతో గేర్‌ రాడ్‌ వైపు కుప్పకూలిపోయాడు. వెనుక సీటులో ఉన్న ప్రయాణికురాలు అప్రమత్తమై తన సీటులోనుంచే స్టీరింగ్‌ నియంత్రించేందుకు ప్రయత్నించారు.
అదే సమయంలో ఆ మార్గంలో వెళుతున్న రామన్నపేట సీఐ మోతీరామ్‌ ముందున్న కారు నెమ్మదిగా వెళ్లడం గమనించారు. వెంటనే కిందకు దూకి, మరో వ్యక్తి సాయంతో ఆ కారును నియంత్రించారు. డ్రైవర్ శ్రీనివాస్‌ను బయటకు తీసి సీపీఆర్ చేసి వెంటనే ఆస్పత్రికి తరలించారు. కానీ అప్పటికే అతడు మరణించినట్లు వైద్యులు ధ్రువీకరించారు.
