బిజినెస్ చేసుకునే వారికి కేంద్ర ప్రభుత్వం సూపర్ న్యూస్ చెప్పింది. ఈ నెల 1వ తేదీ నుంచి కమర్షియల్ ఎల్పీజీ సిలిండర్ ధరలను భారీగా తగ్గించింది. 19 కేజీల సిలిండర్పై రూ.200కు పైగా కోత విధిస్తూ నిర్ణయం తీసుకుంది. జులై తర్వాత వరుసగా రెండో నెల కూడా ఈ ధరలు తగ్గడం విశేషం. పండుగల సీజన్ ముందర వ్యాపారులకు, హోటల్ నిర్వాహకులకు ఇది నిజంగా పెద్ద ఊరట అని చెప్పవచ్చు..
వ్యాపారులకు కలిగిన పెద్ద ఊరట: హోటళ్లు, రెస్టారెంట్లు, టీ కొట్లు నడిపే వారికి ఈ వార్త చాలా సంతోషాన్ని ఇచ్చింది. 19 కేజీల కమర్షియల్ సిలిండర్పై ప్రభుత్వ ఆయిల్ కంపెనీలు సుమారు రూ.206 వరకు తగ్గించాయి. ఇక దీనివల్ల హైదరాబాద్లో ప్రస్తుతం ఈ సిలిండర్ ధర రూ.2,985కు చేరింది. ఢిల్లీలో రూ.2,728, కోల్కతాలో రూ.2,872 వద్ద లభిస్తోంది. ప్రతి నెల నిర్వహణ ఖర్చులు పెరిగిపోతున్న సమయంలో ఈ తగ్గింపు చిన్న, పెద్ద వ్యాపారులందరికీ ఎంతో మేలు చేస్తుంది.
గృహ వినియోగదారులకు మార్పు ఉందా?: మీ ఇంట్లో వాడే 14.2 కేజీల సిలిండర్ ధరలో మాత్రం ఎలాంటి మార్పు లేదు. సాధారణ ఇళ్లలో వాడే గ్యాస్ సిలిండర్ ధరలు పాతపద్ధతిలోనే కొనసాగుతున్నాయి. ఇక ప్రస్తుతం హైదరాబాద్లో గృహ వినియోగ సిలిండర్ ధర రూ.994గా ఉంది. ఢిల్లీలో రూ.942, చెన్నైలో రూ.957గా ఉంది. అంటే ఈ సారి ఊరట కేవలం వ్యాపార రంగానికే పరిమితమైంది.
ధరలు తగ్గడానికి అసలు కారణం ఏంటి?: అంతర్జాతీయంగా ముడి చమురు, ఎల్పీజీ ధరలు తగ్గడమే దీనికి ప్రధాన కారణం. ఇక గతంలో పశ్చిమాసియా ప్రాంతంలో వచ్చిన సమస్యల వల్ల గ్యాస్ ధరలు బాగా పెరిగాయి. కానీ ఇప్పుడు మన దేశం గల్ఫ్ దేశాలతో పాటు రష్యా, అమెరికా నుంచి కూడా ఎక్కువగా చమురు దిగుమతి చేసుకుంటోంది. ఇక దిగుమతులు సజావుగా సాగుతుండటంతో వరుసగా రెండో నెల కూడా ఆయిల్ కంపెనీలు ధరలు తగ్గించగలిగాయి.
ఇక వరుసగా రెండు నెలల నుంచి కమర్షియల్ గ్యాస్ ధరలు తగ్గడం మార్కెట్కు మంచి ఊపునిచ్చింది. రాబోయే రోజుల్లో మిగతా వస్తువుల ధరలు కూడా అదుపులోకి వస్తాయని వ్యాపారులు ఆశిస్తున్నారు.
