కొందరు కేటుగాళ్లు అమాయకులను మోసం చేయడంలో రాటుదేలి పోయారు. మొన్నటి వరకు ఉన్నతాధికారులు, సెలబ్రిటీల పేరుతో, వేషధారణతో మోసాలకు పాల్పడేవారు ఇప్పుడు ఏకంగా ప్రజాప్రతినిధుల ముసుగులో చీటింగ్ చేస్తున్నారు. మహారాష్ట్ర సీఎం శిందే వేషధారణతో ఓ వ్యక్తి అమాయక ప్రజలను మోసం చేశాడు. ఎట్టకేలకు పోలీసులకు చిక్కి జైలు ఊచలు లెక్కపెడుతున్నాడు. అసలేం జరిగిందంటే..?
మహారాష్ట్ర ముఖ్యమంత్రి ఏక్నాథ్ శిందే వేషధారణలో ప్రజలను మోసగిస్తున్నాడు పుణెకు చెందిన విజయ్ మానే అనే వ్యక్తి. కొన్ని రోజులుగా శిందే వేషధారణలో బయట తిరుగుతూ ప్రజలను పట్టిస్తున్నాడు. మోసపోయిన వారు అసలు విషయం గ్రహించి పోలీసులకు ఫిర్యాదు చేయగా.. బండ్‌గార్డెన్ పోలీస్ స్టేషన్లో కేసు నమోదైంది.
నిందితుడు విజయ్.. సామాజిక మాధ్యమాల్లో షేర్ చేసిన ఓ ఫొటోలో సీఎం శిందే నిలబడి ఉండగా.. నేరస్థుడు శరద్ మోహల్ కుర్చీలో కూర్చునట్లు కనిపించాడు. విజయ్ మానే నిత్యం ముఖ్యమంత్రి ఏక్నాథ్ శిందేలా దుస్తులు ధరించి పలు కార్యక్రమాల్లో పాల్గొని ప్రజలను తప్పుదోవ పట్టిస్తున్నాడు. ముఖ్యమంత్రి ఏక్నాథ్ శిందే ఓ నేరస్థుడితో సత్రంలో ఉన్న ఫొటోను సోషల్ మీడియాలో షేర్ చేశాడు. సీఎం శిందే ప్రతిష్ఠను దెబ్బ తీసేలా నిందితుడు విజయ్ మానే ప్రవర్తిస్తున్నాడని కేసు నమోదు చేశారు.
