వేసవి కాలం వాతావరణంలో గాలిలో తేమ శాతం (హుమిడిటీ) తగ్గినప్పుడు గాలి అంతా పొడిగా మారిపోతుంది. ఇలాంటి సమయంలో మనకు తెలియకుండానే బాడీలో చాలా మార్పులు వస్తాయి. చర్మం పొడిబారడం, పెదవులు పగలడం, గొంతులో మంటగా ఉండటం వంటి రకరకాల ఇబ్బందులు మొదలవుతాయి. అసలు గాలిలో తేమ తగ్గితే ఎలాంటి ఆరోగ్య సమస్యలు వస్తాయో ఇప్పుడు చూద్దాం.
చర్మంపై పొలుసులు, దురదలు: గాలి పొడిగా మారినప్పుడు మన చర్మంలో ఉండే సహజమైన తేమ ఆవిరైపోతుంది. దీనివల్ల స్కిన్ అంతా డ్రైగా మారిపోతుంది. కొంతమందికి చర్మంపై పొలుసులు ఊడటం, విపరీతమైన దురద, మంట వంటి చర్మ సమస్యలు ఎదురవుతాయి.
శ్వాస తీసుకోవడంలో ఇబ్బందులు: పొడి గాలి వల్ల ముక్కు, గొంతు లోపల ఉండే శ్లేష్మం ఎండిపోతుంది. దీనివల్ల గొంతునొప్పి, దగ్గు వస్తాయి. కొందరికి ముక్కులోంచి రక్తం కారడం కూడా జరుగుతుంది. ముఖ్యంగా ఆస్తమా ఉన్నవారికి ఈ సమయంలో శ్వాస ఇబ్బందులు మరింత ఎక్కువవుతాయి.
కళ్లు ఎర్రబడటం, మంటలు: మన కంటిని రక్షించే కన్నీటి పొర పొడి గాలి వల్ల త్వరగా ఆవిరైపోతుంది. దీనివల్ల కళ్లు డ్రైగా మారిపోయి.. దురద, మంట పుడతాయి. కళ్లు ఎర్రబడటం కూడా జరుగుతుంది. కంప్యూటర్ల ముందు కూర్చుని పని చేసేవారికి ఈ సమస్య ఇంకాస్త ఎక్కువగా ఉంటుంది.
బాడీ డీహైడ్రేషన్ బారిన పడటం: వాతావరణం పొడిగా ఉన్నప్పుడు మన శరీరంలోని నీటి శాతం చాలా త్వరగా ఆవిరైపోతుంది. దీనివల్ల విపరీతంగా దాహం వేస్తుంది. ఇక బాడీ డీహైడ్రేషన్ (నిర్జలీకరణం) బారిన పడి నీరసంగా అనిపిస్తుంది.
ఇంట్లోని ఫర్నిచర్ కూడా డేంజరే: గాలిలో తేమ తగ్గడం కేవలం మన ఆరోగ్యానికే కాదు.. ఇంట్లోని వస్తువులకు కూడా నష్టం కలిగిస్తుంది. ఇక గాలిలో డ్రైనెస్ వల్ల ఇంట్లో ఉండే చెక్క వస్తువులు (ఫర్నిచర్), పాత పుస్తకాలు పొడిబారిపోయి పగుళ్లు వచ్చే అవకాశం ఉంది.
ఇలా చేస్తే సమస్యల నుంచి బయటపడొచ్చు: ఈ సమస్యల నుంచి తప్పించుకోవడానికి రోజులో పుష్కలంగా నీరు తాగాలి. స్నానం చేసిన వెంటనే, అలాగే బయటకు వెళ్లేముందు మంచి మాయిశ్చరైజర్ లేదా పెట్రోలియం జెల్లీని చర్మానికి రాయాలి. ఇక ఇంట్లో లేదా ఆఫీసులో పొడి గాలిని తగ్గించడానికి ‘హ్యూమిడిఫైర్’ (Humidifier) అనే చిన్న పరికరాన్ని వాడుకుంటే గాలిలో తేమ సమతుల్యంగా ఉంటుంది.
వాతావరణంలో వచ్చే మార్పులను మనం ఆపలేం కానీ, కొన్ని జాగ్రత్తలు తీసుకోవడం ద్వారా మన ఆరోగ్యాన్ని కాపాడుకోవచ్చు.
గమనిక: గాలిలో తేమ తగ్గడం వల్ల శ్వాసకోశ ఇబ్బందులు లేదా కంటి సమస్యలు మరీ ఎక్కువగా ఉంటే, సొంత వైద్యం చేసుకోకుండా వెంటనే డాక్టర్ను సంప్రదించడం మంచిది.
 తగ్గిపోతోందా? అయితే మీరు అలర్ట్ అవ్వాల్సిందే. గాలి పొడిగా మారడం వల్ల కేవలం చర్మం మాత్రమే కాదు..){kind=link}