ఛత్తీస్‌గఢ్ రాష్ట్రంలోని సుక్మా జిల్లాలో మరోసారి ఎదురుకాల్పులు చోటుచేసుకున్నాయి. ఈ కాల్పుల్లో కిస్టారం ఏరియా కమిటీ సభ్యుడు లోకేష్ మృతి హతమైనట్లు తెలుస్తోంది. సుక్మా జిల్లాలోని కిస్టారం పీఎస్ పరిధిలోని పామలూరు గ్రామ అటవీ-కొండలో పోలీసులు, నక్సలైట్లు ఒకే సారి ఎదురు పడటంతో ఎదురు కాల్పులు జరిగినట్లు సమాచారం.
మావోయిస్టుల గురించి సమాచారం తెలియడంతో డీ‌ఆర్‌జీ , బస్తర్ ఫైటర్, 206 కోబ్రా, 208 కోబ్రా, 131 సీఆర్పీఎఫ్ దళాల ఉమ్మడి బృందం ఆధ్వర్యంలో దబ్బకొండ, అంతపాడ్ బుర్కలంక, పామ్లూర్, సింఘనమడ్గు, పరిసర ప్రాంతాలలో నక్సల్ వ్యతిరేక ఆపరేషన్ నిర్వహించారు. ఈ క్రమంలోనే జరిగిన తాజా ఎదురుకాల్పుల్లో మావోయిస్టు ఏసిఎం లోకేష్ మృతి చెందినట్లు అధికారులు తెలిపారు. ఘటనా స్థలం నుండి ఆయుధాలు స్వాధీనం చేసుకున్నట్లు పోలీసులు పేర్కొన్నారు.తప్పించుకున్న మావోయిస్టుల కోసం భద్రతా బలగాలు గాలింపు చర్యలు చేపట్టినట్లు తెలిపారు.
