శరీరాన్ని ఫిట్గా ఉంచుకోవడానికి రోజూ వ్యాయామం చేయడం మంచి అలవాటే. కానీ, జులై వచ్చిన వానలు సరిగ్గా పడటం లేదు. వాతావరణం ఒక్కో రోజు వేసవి కాలం ను తలపిస్తుంది. మండిపోయే ఎండల్లో వర్కవుట్స్ చేసేటప్పుడు సరైన జాగ్రత్తలు తీసుకోకపోతే ఆరోగ్యానికి తీవ్ర ప్రమాదం వాటిల్లే అవకాశం ఉంది. తీవ్రమైన వేడి వల్ల శరీరం త్వరగా అలిసిపోవడమే కాకుండా వడదెబ్బ, నీరసం వంటి సమస్యలు చుట్టుముడతాయి. మరి ఎండల సమయంలో ఎలాంటి ప్రమాదాలు బారిన పడకుండా, సేఫ్గా వ్యాయామం ఎలా చేయాలో ఇప్పుడు వివరంగా తెలుసుకుందాం.
వ్యాయామానికి సరైన సమయం: మండే ఎండల్లో వ్యాయామం చేయడానికి ఉదయం సూర్యోదయానికి ముందే లేదా సాయంత్రం వేళలు మాత్రమే అనుకూలం. ఇక ఉదయం 11 గంటల నుంచి మధ్యాహ్నం 3 గంటల వరకు ఎండ తీవ్రత అత్యధికంగా ఉంటుంది. కాబట్టి ఆ సమయంలో బయట వ్యాయామాలు అస్సలు చేయకూడదు.
కాటన్ దుస్తులకే ప్రాధాన్యం: వర్కవుట్స్ చేసేటప్పుడు వేసుకునే దుస్తుల విషయంలో జాగ్రత్త వహించాలి. గాలి బాగా ఆడేలా ఉన్న తేలికపాటి, వదులైన కాటన్ దుస్తులను ఎంచుకోవాలి. ఇక ముఖ్యంగా తెల్లని లేదా లేత రంగు బట్టలు ధరిస్తే ఇవి వేడిని నిరోధించి శరీరాన్ని చల్లగా ఉంచడానికి సహాయపడతాయి.
హైడ్రేషన్ చాలా ముఖ్యం: వ్యాయామం చేయడానికి కనీసం 30 నిమిషాల ముందే తగినంత నీరు తాగి శరీరాన్ని సిద్ధం చేసుకోవాలి. ఇక వర్కవుట్ చేసే సమయంలో దాహం వేయకపోయినా మధ్యమధ్యలో కొద్దికొద్దిగా నీళ్లు కానీ, మజ్జిగ, ఓఆర్ఎస్ (ORS) వంటి ఎలక్ట్రోలైట్ డ్రింక్స్ కానీ తాగుతూ ఉండాలి.
విశ్రాంతి మరియు శరీర హెచ్చరికలు: వేడికి శరీరం త్వరగా అలసిపోతుంది కాబట్టి మధ్యమధ్యలో నీడలో విశ్రాంతి తీసుకుంటూ నెమ్మదిగా వ్యాయామం చేయాలి. ఇక ఒకవేళ వర్కవుట్ చేసేటప్పుడు తలతిరగడం, కళ్లు బైర్లు కమ్మడం, వాంతులు లేదా అధిక నీరసం అనిపిస్తే వెంటనే ఆపేసి చల్లని ప్రదేశానికి వెళ్లాలి.
ఇక ఫిట్నెస్పై దృష్టి పెట్టడం ఎంత ముఖ్యమో, వాతావరణానికి తగినట్లుగా మన ఆరోగ్యాన్ని కాపాడుకోవడం కూడా అంతే ముఖ్యం. ఎండల్లో వ్యాయామం చేసేటప్పుడు ఈ చిన్న చిన్న జాగ్రత్తలు పాటిస్తే ఎలాంటి ప్రమాదం లేకుండా సురక్షితంగా, ఆరోగ్యంగా ఉండవచ్చు!
గమనిక: ఇది మీ అవగాహన కోసం అందించిన సాధారణ సమాచారం మాత్రమే. వ్యాయామం చేసేటప్పుడు తీవ్రమైన అస్వస్థత లేదా తలతిరిగినట్లు అనిపిస్తే సొంత వైద్యం చేసుకోకుండా వెంటనే డాక్టర్ను సంప్రదించాలి.
