దక్షిణాఫ్రికా క్రికెటర్ హర్షలే గిబ్స్ గురించి ప్రతి ఒక్కరికీ తెలిసే ఉంటుంది. అతడు ఆటతో ప్రపంచవ్యాప్తంగా ఎంతో మంది క్రికెట్ అభిమానులకు చేరువయ్యాడు. దక్షిణాఫ్రికా నేషనల్ జట్టు నుంచి రిటైరైన తర్వాత గిబ్స్ అడపాదడపా టీ20 లీగుల్లో మెరస్తున్నాడు. కాగా గిబ్స్ తాజాగా భారత క్రికెట్ కంట్రోల్ బోర్డు బీసీసీఐ మీద చేసిన ఆరోపణలు టాక్ ఆఫ్ ది టౌన్ గా మారాయి. ఇతడి ఆరోపణలను చాలా మంది క్రికెటర్లు నమ్ముతున్నారు. ఇతడికి అండగా నిలుస్తున్నారు. బీసీసీఐ వ్యవహార శైలిని తప్పు బడుతున్నారు.
ఇక ఏం జరిగిందంటే… పాకిస్తాన్ దేశం నిర్వహిస్తున్న కశ్మీర్ ప్రీమియర్ లీగ్ లో గిబ్స్ పాల్గొననున్నాడు. ఇందుకు సంబంధించిన ఏర్పాట్లను కూడా అతడు సిద్ధం చేసుకుంటున్నాడు. కశ్మీర్ ప్రీమియర్ లీగ్ నిర్వహించడం నచ్చని బీసీసీఐ అతడిని ఆ లీగ్ లో ఆడొద్దని వారించిందట. అంతే కాకుండా కశ్మీర్ ప్రీమియర్ లీగ్ లో ఆడితే తాను ఇకపై భారత్ లో బీసీసీఐ నిర్వహించే ఏ ఈవెంట్ లోనూ పాల్గొనేందుకు, ఆడేందుకు అనుమతించమని హెచ్చరికలు జారీ చేసిందట. ఇలా హెచ్చరికలు జారీ చేయడం సబబు కాదని గిబ్స్ ట్విటర్ వేదికగా బీసీసీఐ పై విమర్శలు గుప్పించాడు. అతడి వాదనలతో ఏకీభవిస్తూ… పలువురు పాకిస్తాన్ మాజీ క్రికెటర్లు కూడా బీసీసీఐ పై ఆగ్రహం వ్యక్తం చేస్తున్నారు. కానీ ఇంత వరకు ఈ వివాదంపై బీసీసీఐ పెద్దలు మాత్రం స్పందించకపోవడంతో అసలు విషయం తెలియడం లేదు. కాగా కశ్మీర్ ప్రీమియర్ లీగ్ ఆగస్టు 6వ తేదీ నుంచి మొదలు కానుంది. ఈ లీగ్ లో మొత్తం ఆరు జట్లు పాల్గొంటుండగా… ఆరుగురు పాకిస్తానీ ప్లేయర్లు కెప్టెన్స్ గా వ్యవహరించనున్నారు.
