సోషల్ మీడియా వేదిక ఏపీ ప్రభుత్వం, సీఎం జగన్‌పై ఫేక్‌ న్యూస్‌ను ప్రచారం చేస్తున్న వారిపై పోలీసులు కొరడా ఝుళిపిస్తున్నారు. ఈ నేపథ్యంలో సోషల్ మీడియాలో పోస్టుల కేసులో టీడీపీ రాష్ట్ర ప్ర‌ధాన కార్య‌ద‌ర్శి, శ్రీకాకుళం జిల్లా ప‌లాస నియోజ‌క‌వ‌ర్గ ఇంచార్జీ గౌతు శిరీషను సీఐడీ అధికారులు సోమ‌వారం దాదాపుగా 7 గంటల పాటు విచారించారు. మంగ‌ళ‌గిరి ప‌రిధిలోని డీజీపీ కార్యాల‌యంలోని సీఐడీ విభాగంలో జ‌రిగిన ఈ విచార‌ణ ముగిసిన అనంత‌రం డీజీపీ కార్యాల‌యం బ‌య‌ట త‌న‌ను క‌లిసిన మీడియా ప్ర‌తినిధుల‌తో మాట్లాడిన సంద‌ర్భంగా శిరీష్ సంచలన విషయాలు వెల్లడించారు.
ఈ కేసులో నేరం ఒప్పుకోవాలంటూ సీఐడీ అధికారులు త‌న‌పై ఒత్తిడి తీసుకువ‌చ్చార‌ని శిరీష ఆరోపించారు. అయిదే దానికి తాను స‌సేమిరా ఒప్పుకోలేద‌ని వెల్లడించారు శిరీష. ఈ కేసును న్యాయ‌ప‌రంగానే తాను ఎదు‌ర్కొంటాన‌ని సీఐడీ అధికారుల‌కు చెప్పిన‌ట్లు వెల్లడించారు శిరీష. అంతేకాకుండా సోషల్ మీడియాలో పోస్టులు పెట్టాలంటూ తానెవ‌రికీ చెప్ప‌లేద‌ని కూడా తెలిపానని, ఇక విచార‌ణ‌లో భాగంగా సీఐడీ అధికారులు త‌న‌ను ఇబ్బందిపెట్టార‌ని ఆరోపించారు శిరీష. 7 గంటల పాటు విచార‌ణ సాగ‌గా… మ‌ధ్యాహ్నం వేళ త‌న‌కు క‌నీసం భోజ‌నం కూడా పెట్ట‌లేద‌ని ఆరోపించారు ఆమె. అంతేకాకుండా విచార‌ణ సంద‌ర్భంగా త‌న న్యాయ‌వాది ఉండడానికి కూడా సీఐడీ అధికారులు ఒప్పుకోలేద‌ని ఆగ్ర‌హం వ్య‌క్తం చేశారు శిరీష.
