రాష్ట్రంలో గ్రూప్-3 పరీక్షలు ప్రారంభమయ్యాయి. ఆలస్యంగా వచ్చిన పలువురిని అధికారులు అనుమతించకపోవడంతో సెంటర్ల వద్ద కాస్త గందరగోళం నెలకొంది. ఉదయం 10 నుంచి మధ్యాహ్నం 12:30 వరకు పేపర్-1, మధ్యాహ్నం 3 నుంచి సాయంత్రం 5:30 గంటల వరకు పేపర్-2 పరీక్ష జరగనుంది. 18న ఉదయం 10 నుంచి మధ్యాహ్నం 12:30 గంటల వరకు పేపర్-3 పరీక్ష నిర్వహించనున్నట్లు తెలంగాణ పబ్లిక్ సర్వీస్ కమిషన్ తెలిపింది.
మొత్తం 1,365 గ్రూప్ -3 పోస్టులకు రాత పరీక్షలు జరుగుతున్నాయి. ఈ పరీక్షలకు మొత్తం 5.36 లక్షల మంది అభ్యర్థులు దరఖాస్తు చేసుకున్న విషయం తెలిసిందే. ఈ క్రమంలోనే సీఎం రేవంత్ ఆదివారం సోషల్ మీడియా ‘ఎక్స్’ వేదికగా గ్రూప్-3 అభ్యర్థులకు శుభాకాంక్షలు తెలిపారు. ‘ఈ రోజు గ్రూప్ -3 పరీక్షకు హాజరవుతున్న ఉద్యోగార్థులకు హృదయపూర్వక శుభాకాంక్షలు. ఈ పరీక్షలో మీరు విజయం సాధించి..కొలువుల కలలను సాకారం చేసుకోవాలని మనస్ఫూర్తిగా కోరుకుంటున్నాను’ అని రాసుకొచ్చారు.
