దుబ్బాక(Dubbaka)మున్సిపాలిటీకి చెందిన నేతల ప్రవర్తన ప్రస్తుతం రాష్ర్ట వ్యాప్తంగా సంచలనంగా మారింది. వారు చేసిన నిర్వాకం వల్ల రాష్ర్ట వ్యాప్త గుర్తింపు తెచ్చుకున్నారు. అదేదో మంచి విషయాల్లో అని అనుకుంటే పొరబడినట్లే . అసలేం జరిగిందంటే… దుబ్బాక మున్సిపాలిటీకి చెందిన ముగ్గురు నేతలు నిన్న బీజేపీ రాష్ర్ట అధ్యక్షుడు బండి సంజయ్ సమక్షంలో కాషాయ కండువా కప్పుకున్నారు. ఇంత వరకు బాగానే ఉన్నా ఆ తర్వాతే అసలు కథ నడిచింది. అధికార టీఆర్ఎస్ నుంచి అదీ సీఎం సొంత జిల్లా లో ఇలా టీఆర్ఎస్ ప్రజాప్రతినిధులు పార్టీ మారడాన్ని జీర్ణించుకోలేకపోయారు నేతలు. ఈ రోజు పొద్దున వరకు మరలా వారిని సెట్ చేసి వారితో మళ్లా కండువాలు మార్చే కార్యక్రమం పెట్టించారు. ఇలా ఒకే రోజు వ్యవధిలో ఒకే వ్యక్తి రెండు పార్టీకు వెళ్లడం చూసిన జనాలు చేసేదేం లేక హవ్వా ఇదేం తీరు అని అనుకుంటున్నారు.
దుబ్బాక ఉప ఎన్నికల్లో అధికార టీఆర్ఎస్ ట్రబుల్ షూటర్ హరీష్ రావు బాధ్యతలు అప్పగించినప్పటికీ అక్కడ బీజేపీ చేతిలో ఓడిపోయింది. ఆ ఓటమిని ఇంకా మర్చిపోని టీఆర్ఎస్ నాయకులకు ఇలా కౌన్సిలర్లు పార్టీ మారడం ఏ మాత్రం రుచించలేదు. దీంతో రాత్రికి రాత్రే వారిని బెదిరించో బతిమలాడో పార్టీలోకి తీసుకువచ్చారని పలువురు చర్చించుకుంటున్నారు. అంతే కాకుండా మిగిలిన మూడో వ్యక్తి కూడా త్వరలోనే తిరిగి గులాబీ గూటికి చేరుతారని ధీమాగా చెబుతున్నారు. ఇలా పార్టీలో చేరిన వారికి ట్రబుల్ షూటర్ హరీష్ రావు కండువాలు కప్పి పార్టీలోకి ఆహ్వానించారు. ఇలా ఈ దుబ్బాక కౌన్సిలర్లు చేసిన పని వల్ల ఒకే రోజులో రాష్ర్ట వ్యాప్తంగా ఫేమ్ సంపాదించుకున్నారు.
