హైటెక్ సిటీ చేరువలో ఫైర్ డిపార్ట్మెంట్ ఎన్వోసీ లేకుండా, ఎయిర్పోర్ట్ ఎన్ఓసి లేకుండా, అక్రమంగా అదనపు అంతస్తులు నిర్మిస్తుంటే జిహెచ్ఎంసి ఆ నిర్మాణాన్ని నిలిపివేయకుండా ఏం చేస్తుందని తెలంగాణ హైకోర్టు శుక్రవారం ఆగ్రహం వ్యక్తం చేసింది. హైటెక్ సిటీ చేరువలో నమిత హోమ్స్ 25 అంతస్తుల ఎత్తులో నిర్మిస్తున్న 360 లైఫ్ ప్రాజెక్టును 2025 మే నెలలో నిలిపివేసిన జిహెచ్ఎంసి…. అక్రమాలని సరిదిద్దకుండా మళ్ళీ మరుసటి నెలలోనే అనుమతుల్ని ఎలా మంజూరు చేసిందని జిహెచ్ఎంసిని నిలదీసింది.
వివరాల్లోకి వెళితే… నమిత హోమ్స్ సంస్థ హైటెక్ సిటీకి చేరువలో 360 లైఫ్ అనే ప్రాజెక్టును నిర్మిస్తోంది. దీనికి చెందిన కొందరు షేర్ హోల్డర్లు జిహెచ్ఎంసి పునఃఅనుమతిని ఇవ్వడాన్ని వ్యతిరేకిస్తూ తెలంగాణ హైకోర్టు లో కేసు దాఖలు చేశారు. ఈ నిర్మాణంలో సుమారు 18 లోపాలను గమనించిన జిహెచ్ఎంసి….వాటిని సరిదిద్దకుండా తిరిగి అనుమతులని ఎలా మంజూరు చేశారంటూ ప్రశ్నించారు. దీనికి జిహెచ్ఎంసి సమాధానం ఇస్తూ ఒకవేళ నిర్మాణ లోపాల్ని సవరించకపోతే ఆక్యుపెన్సీ సర్టిఫికెట్ జారీ చేసే సమయంలో తగిన చర్యలను తీసుకుంటామని తెలియజేసింది.
అయితే దీనిపై హైకోర్టు ఘాటుగా రియాక్ట్ అయ్యింది. అలాంటి చర్యల వల్ల అక్రమ నిర్మాణాల్ని ప్రోత్సహించినట్లు అవుతుందని స్పష్టం చేసింది. ముందుగా జారీ చేసిన నిర్మాణం నిలిపివేయమనే ఆదేశం గురించి రీవాలిడేషన్ లేఖలో ఒక్కసారి కూడా ఎందుకు ప్రస్తావించలేదని బెంచి ప్రత్యేకంగా ప్రశ్నించింది. ఈ మొత్తం నిర్మాణంపై స్టే విధిస్తూ తెలంగాణ హైకోర్టు తీర్పునిచ్చింది.
