అమెరికా అధ్యక్షుడు జో బైడెన్‌ను చంపుతానంటూ భారత సంతతి యువకుడు సాయి వర్షిత్ కందుల (19) ట్రక్కుతో వెళ్లి వైట్ హౌజ్ బారికేడ్లను ఢీకొన్న విషయం తెలిసిందే. ఈ క్రమంలో వర్షిత్కు గరిష్ఠంగా పదేళ్ల జైలుశిక్ష, రూ.2 కోట్ల (2,50,000 డాలర్లు) జరిమానా విధించే అవకాశముంది. బుధవారం ఫెడరల్‌ కోర్టు జడ్జి రాబిన్‌ మెరివెదర్‌ ఎదుట వర్షిత్‌ను హాజరుపరచగా, మే 30 దాకా కస్టడీకి ఆదేశిస్తూ న్యాయమూర్తి ఉత్తర్వులు జారీ చేశారు.
నారింజ రంగు జంప్‌సూట్‌లో కోర్టుకు హాజరైన వర్షిత్ జడ్జి అడిగిన ప్రశ్నలకు వినయంగా, పొడిగా బదులిచ్చాడు. ఆస్తుల విధ్వంసం, నిర్లక్ష్యంగా వాహనం నడపటం, అధ్యక్షుణ్ని చంపుతానని బెదిరించటం, అనుమతి లేకుండా చొరబడటం.. ఇలా పలు అభియోగాలను వర్షిత్‌పై పోలీసులు నమోదు చేశారు. ఈ నేరాలకు గరిష్ఠంగా పదేళ్ల జైలుశిక్ష, రూ.2 కోట్ల జరిమానా విధించే అవకాశం ఉన్నట్లు నిందితుడికి చెప్పిన న్యాయమూర్తి వచ్చే వారం తదుపరి విచారణ ఉంటుందని అన్నారు.
