అమెరికా అధ్యక్షుడి హత్యే లక్ష్యంగా ఓ యువకుడు వైట్ హౌజ్పైకి ట్రక్కుతో దూసుకెళ్లిన ఘటన మరవకముందే బ్రిటన్‌ ప్రధాన మంత్రి రిషి సునాక్ అధికార నివాసంపై దాడి జరిగింది. లండన్‌లోని 10 డౌనింగ్‌ స్ట్రీట్‌ గేటును గురువారం సాయంత్రం వేగంగా వచ్చిన ఓ కారు ఢీ కొట్టింది. వెంటనే స్పందించిన భద్రతా సిబ్బంది కారులో ఉన్న వ్యక్తిని అదుపులోకి తీసుకున్నారు. ఈ ఘటనలో ఎవరూ గాయపడలేదని పోలీసులు తెలిపారు. నిందితుడిపై కేసు నమోదు చేసి దర్యాప్తు చేస్తున్నారు.
గేటును కారు ఢీకొన్న వెంటనే భద్రతా సిబ్బంది ఆ వీధిలో వాహనాల రాకపోకలను నిలిపి వేసి ఇంకా ఎవరైనా దుండగులు ఉన్నారేమోనని తనిఖీలు చేపట్టారు. అనుమానించాల్సిన పరిస్థితులేమీ లేకపోవడంతో దిగ్బంధనాన్ని తొలగించారు. ఈ ఘటన జరిగిన సమయంలో ప్రధాని రిషి సునాక్ తన కార్యాలయంలోనే ఉన్నారు. ముందుగా నిర్ణయించిన కార్యక్రమానికి హాజరయ్యేందుకు మరో మార్గం నుంచి ఆయన వెలుపలికి వెళ్లారు. కొద్ది సమయం వరకూ అధికారులెవరూ బయటకు రావద్దని పోలీసులు ఆదేశించారు.
