ప్రతి నెలా పీరియడ్స్ సమయంలో కడుపు నొప్పి, అలసట, మూడ్ స్వింగ్స్, కడుపు ఉబ్బరం వంటి సమస్యలు చాలామంది మహిళలను ఇబ్బంది పెడుతుంటాయి. శరీరంలో జరిగే హార్మోన్ల మార్పులే దీనికి కారణం. అయితే ఈ సమయంలో మనం తీసుకునే కొన్ని తప్పుడు ఆహారపు అలవాట్లు ఆ నొప్పులను మరింత పెంచుతాయని నిపుణులు అంటున్నారు. మరి పీరియడ్స్ టైమ్లో ఎలాంటి జాగ్రత్తలు తీసుకోవాలో, ఏవి తింటే మంచిదో ఇప్పుడు వివరంగా తెలుసుకుందాం..
టీ, కాఫీలు ఎక్కువగా తాగుతున్నారా?: నీరసంగా ఉందనో లేదా నొప్పి తగ్గుతుందనో చాలామంది పీరియడ్స్ టైమ్లో కప్పుల కొద్దీ టీ, కాఫీలు తాగేస్తుంటారు. కానీ కెఫీన్ ఎక్కువగా తీసుకోవడం వల్ల కండరాల నొప్పులు, అలసట మరింత ఎక్కువవుతాయి. అంతేకాకుండా ఇది శరీరంలో ఐరన్ను సోషించుకోకుండా అడ్డుకుంటుంది. అందుకే టీ, కాఫీలకు బదులుగా వెచ్చని వాము నీటిని తాగడం చాలా మంచిది.
కార్బోహైడ్రేట్లను పూర్తిగా మానకండి: పీరియడ్స్ సమయంలో హార్మోన్ల స్థాయిలు తగ్గిపోవడం వల్ల చిరాకు, మూడ్ స్వింగ్స్ పెరుగుతాయి. ఈ టైమ్లో కార్బోహైడ్రేట్లను పూర్తిగా పక్కన పెడితే నీరసం మరింత ఎక్కువవుతుంది. ఇక అందుకే బరువు పెరుగుతామనే భయంతో కార్బ్స్ ఆపకుండా వేడిగా, తేలికగా అరిగే సజ్జ ఖిచ్డీ లేదా రాజ్గిరా వంటి ఆహారాలను తక్కువ పరిమాణంలో తీసుకోవాలి.
స్వీట్స్ మోజులో చాక్లెట్లు వద్దు: ఈ సమయంలో తీపి పదార్థాలు తినాలనే కోరిక ఎక్కువగా ఉంటుంది. అయితే ప్రాసెస్ చేసిన చాక్లెట్లు తింటే రక్తంలో షుగర్ లెవల్స్ ఒక్కసారిగా పెరిగి, ముఖంపై మొటిమల సమస్య వస్తుంది. ఇక దానికి బదులుగా వేయించిన శనగలు, నల్ల నువ్వులు లేదా నువ్వులు-బెల్లం లడ్డూలను తింటే శరీరానికి ఐరన్, బలం అందుతాయి.
చల్లని ఆహారాలకు దూరంగా ఉండండి: పీరియడ్స్ టైమ్లో జీర్ణక్రియ కాస్త మందగిస్తుంది. చల్లటి పదార్థాలు లేదా పచ్చి సలాడ్లు తింటే కడుపులో అసౌకర్యం, నొప్పి పెరుగుతాయి. ఇక అందుకే శరీరానికి వెచ్చదనాన్నిచ్చే, సులభంగా జీర్ణమయ్యే వేడి వేడి మసూర్ దాల్ లేదా సూప్లు తీసుకోవడం శ్రేయస్కరం.
రక్తహీనత, తీవ్ర అలసట నివారణ: రక్తస్రావం వల్ల శరీరంలో ఐరన్ నిల్వలు తగ్గిపోతాయి. దీనివల్ల వచ్చే విపరీతమైన అలసటను నివారించడానికి నీటిలో నానబెట్టిన ఒక చెంచా హాలిమ్ విత్తనాలలో కాస్త నిమ్మరసం కలుపుకొని తీసుకోవాలి. ఇక ఇది ఐరన్ స్థాయిలను వేగంగా పెంచడానికి సహాయపడుతుంది.
పీరియడ్స్ సమయంలో చిన్న చిన్న ఆహార మార్పులు చేసుకోవడం వల్ల హార్మోనల్ అసమతుల్యత వల్ల వచ్చే నొప్పి, అసౌకర్యాల నుంచి సులువుగా ఉపశమనం పొందవచ్చు. ఇక పోషకాలతో కూడిన వేడి ఆహారాన్ని తింటూ, శరీరానికి తగినంత విశ్రాంతిని ఇవ్వడం చాలా ముఖ్యం.
గమనిక: ఇది కేవలం అవగాహన కోసం అందించిన సమాచారం మాత్రమే. ప్రతి నెలా తీవ్రమైన నొప్పులు లేదా హార్మోనల్ సమస్యలు వేధిస్తుంటే కచ్చితంగా గైనకాలజిస్ట్ లేదా న్యూట్రిషనిస్ట్ను సంప్రదించి తగిన సలహా తీసుకోవాలి.
