మీరు మొబైల్‌ గేమ్స్‌ బాగా ఆడుతారా ? అయితే టెలికాం కంపెనీ జియో మీకు అద్భుత అవకాశం అందిస్తోంది. త్వరలో ప్రారంభం కానున్న గేమింగ్ టోర్నమెంట్‌లో ఏకంగా రూ.12.50 లక్షలను గెలుచుకునే అవకాశాన్ని జియో అందిస్తోంది. ఇందుకు గాను జియో ప్రముఖ చిప్‌ తయారీ దారు మీడియాటెక్‌తో భాగస్వామ్యం అయింది. ఈ క్రమంలోనే గేమింగ్ మాస్టర్స్‌ పేరిట ఓ మొబైల్‌ గేమింగ్ టోర్నమెంట్‌ను త్వరలో నిర్వహించనున్నారు.
జియో, మీడియాటెక్‌ కంపెనీలు నిర్వహించనున్న గేమింగ్ మాస్టర్స్‌ టోర్నమెంట్‌కు గాను డిసెంబర్‌ 29వ తేదీ నుంచే రిజిస్ట్రేషన్లు ప్రారంభం అయ్యాయి. https://play.jiogames.com/esports అనే లింక్‌ను సందర్శించి గేమింగ్ మాస్టర్స్‌ టోర్నమెంట్‌లో పాల్గొనేందుకు గేమింగ్ ప్రియులు రిజిస్టర్‌ చేయించుకోవచ్చు. ఇక జనవరి 13 నుంచి మార్చి 7వ తేదీ వరకు ఈ టోర్నమెంట్‌ జరుగుతుంది. ఇందులో భాగంగా ఫ్రీ ఫైర్‌ అనే బ్యాటిల్‌ రాయల్‌ గేమ్‌ను ఆడితే అందులో విజేతలుగా నిలిచిన వారికి రూ.12.50 లక్షలను అందజేస్తారు. ఈ టోర్నమెంట్‌ జియో గేమ్స్‌ ప్లాట్‌ఫాంపై జరగనుంది. ఈ టోర్నమెంట్‌ను జియో టీవీ హెచ్‌డీ ఇస్పోర్ట్స్‌ చానల్‌, యూట్యూబ్‌లలో ప్రత్యక్ష ప్రసారం చేస్తారు.
ఇక ఈ టోర్నమెంట్‌లో జియో, నాన్‌ జియో కస్టమర్లు ఎవరైనా పాల్గొనవచ్చు. ఇందుకు గాను ఎలాంటి రిజిస్ట్రేషన్‌ ఫీజును చెల్లించాల్సిన పనిలేదు. మరిన్ని వివరాలకు https://i.mediatek.com/free-fire-gaming-master-Jioesport అనే లింక్‌ను సందర్శించవచ్చు. దేశంలోని గేమింగ్ ప్రియుల కోసం ఈ టోర్నమెంట్‌ను సంయుక్తంగా నిర్వహిస్తున్నట్లు జియో, మీడియాటెక్‌ సంస్థలు తెలిపాయి. ఇక ఇటీవలే జియో గేమ్స్‌ మొదటి సారిగా ఇండియా కా గేమింగ్ చాంపియన్‌ అనే టోర్నమెంట్‌ను నిర్వహించగా.. త్వరలో జరగనున్న గేమింగ్ మాస్టర్స్‌ టోర్నమెంట్‌ జియోకు రెండో టోర్నమెంట్‌ కానుంది.
