మహిళల్లో వయసు పెరిగే కొద్దీ కీళ్ల నొప్పులు, ఎముకల బలహీనత రావడం సహజం. అయితే పురుషులతో పోలిస్తే మహిళల్లో మెనోపాజ్ (పీరియడ్స్ ఆగిపోవడం) తర్వాత ఈ సమస్యలు మరింత తీవ్రమవుతాయి. దీనికి ప్రధాన కారణం శరీరంలో జరిగే హార్మోన్ల మార్పులే. మరి మెనోపాజ్ సమయంలో కీళ్ల నొప్పులు ఎందుకు వస్తాయి? వీటి నుంచి ఉపశమనం పొందేందుకు ఎలాంటి జాగ్రత్తలు తీసుకోవాలో ఇప్పుడు వివరంగా తెలుసుకుందాం..
ఈస్ట్రోజెన్ లోపం – హార్మోన్ల మార్పులు: మహిళల్లో ఎముకల బలాన్ని, కీళ్ల ఆరోగ్యాన్ని కాపాడటంలో ‘ఈస్ట్రోజెన్’ అనే హార్మోన్ కీలక పాత్ర పోషిస్తుంది. ఇక మెనోపాజ్ దశకు రాగానే శరీరంలో ఈస్ట్రోజెన్ స్థాయిలు వేగంగా తగ్గిపోతాయి. దీనివల్ల ఎముకల సాంద్రత తగ్గి, కీళ్లలో వాపు, నొప్పులు మరియు ఆర్థరైటిస్ వంటి సమస్యలు మొదలవుతాయి.
పోషకాహార లోపం తీవ్ర ప్రభావం: మెనోపాజ్ సమయంలో శరీరానికి అవసరమైన కాల్షియం, విటమిన్ డి, ప్రొటీన్ వంటి పోషకాలు అందకపోతే ఎముకలు మరింత బలహీనపడతాయి. ఇక చిన్న వయసు నుంచే సరైన పోషకాహారం తీసుకోకపోవడం వల్ల వయసు పెరిగే కొద్దీ మోకాళ్లు, తుంటి మరియు పాదాల కీళ్లపై తీవ్రమైన ఒత్తిడి పడుతుంది.
ఆహారంలో మార్పులు – ముఖ్యమైన విటమిన్లు: ఎముకలను దృఢంగా ఉంచుకోవడానికి రోజూ పాలు, పెరుగు, జున్ను, నువ్వులు, పాలకూర వంటి కాల్షియం సమృద్ధిగా ఉండే ఆహారాన్ని తీసుకోవాలి. అలాగే విటమిన్ డి కోసం ఉదయాన్నే లేత సూర్యరశ్మిలో గడపాలి. ఇక అవసరమైతే డాక్టర్ లేదా డైటీషియన్ సలహాతో సప్లిమెంట్లు వాడవచ్చు.
శారీరక శ్రమ – బరువు నియంత్రణ: ఉద్యోగం చేసే మహిళలు గంటల తరబడి ఒకేచోట కూర్చోకుండా మధ్యమధ్యలో కదులుతుండాలి. రోజూ వాకింగ్, సైక్లింగ్, స్విమ్మింగ్ లేదా యోగా చేయడం వల్ల కండరాలు బలంగా మారతాయి. ఇక అధిక బరువు ఉన్నవారు బరువు తగ్గించుకోవడం వల్ల కీళ్లపై పడే భారం తగ్గుతుంది.
మెనోపాజ్ అనేది మహిళల జీవితంలో ఒక సహజమైన దశ. సరైన జీవనశైలి, సమతులాహారం మరియు క్రమంతప్పని వ్యాయామం ద్వారా ఎముకలను, కీళ్లను ఆరోగ్యంగా ఉంచుకుంటూ మెనోపాజ్ దశను సులభంగా ఎదుర్కోవచ్చు.
గమనిక: ఈ సమాచారం కేవలం అవగాహన కోసం మాత్రమే అందించబడింది. కుటుంబంలో ఆర్థరైటిస్ చరిత్ర ఉన్నవారు లేదా తీవ్రమైన కీళ్ల నొప్పులు, ఎముకల సమస్యలతో బాధపడుతున్న మహిళలు వెంటనే నిపుణులైన వైద్యులను సంప్రదించి పరీక్షలు చేయించుకోవడం మంచిది.
){kind=link}