ఉత్తర కొరియా అణు సంపదపై ఆ దేశాధినేత కిమ్ జోంగ్ ఉన్ ప్రశంసల వర్షం కురిపించారు. ఎంతో శ్రమించి కూడబెట్టుకున్న అణ్వాయుధాలతో దేశ భద్రతకు ఢోకా లేదని పేర్కొన్నారు. అణునిరాయుధీకరణ అంశం మీద అమెరికాతో చర్చలపై నీలినీడలు కమ్ముకున్న నేపథ్యంలో కిమ్ వ్యాఖ్యలకు ప్రాధాన్యం సంతరించుకున్నాయి.
కొరియన్ యుద్ధం(1950-53) 67వ వార్షికోత్సవం సందర్భంగా వీరులనుద్దేశించి ప్రసంగించారు కిమ్. దేశంలో ఉన్న అణు సంపదపై ఆధారపడవచ్చని.. రెండో కొరియన్ యుద్ధాన్ని నిరోధించగల సామర్థ్యం వాటికుందని వెల్లడించారు. దీంతో అణ్వాయుధాలను ఒదులుకోనని కిమ్ పరోక్షంగా మరోమారు ప్రపంచానికి తెలియజేశారు.మరోవైపు అమెరికాతో ఇప్పట్లో చర్చలు ఉండకపోవచ్చనే సంకేతాలు బలంగా కనపడుతున్నాయి. ఇందుకు త్వరలో అగ్రరాజ్యంలో జరగనున్న అధ్యక్ష ఎన్నికలు ఓ కారణం. అమెరికా నాయకత్వంలో మార్పులు జరిగే అవకాశముందన్న ఊహాగానాల నేపథ్యంలో అగ్రరాజ్యంతో ఉత్తర కొరియా చర్చలు జరపడానికి ఇష్టపడటం లేదు. అదే సమయంలో కిమ్తో చర్చలకు అధ్యక్షుడు ట్రంప్ కూడా విముఖత చూపిస్తున్నారు. తనకు ఏదైనా పురోగతి కనిపిస్తేనే చర్చలు జరుపుతానని తేల్చిచెబుతున్నారు
