దేశ సార్వభౌమాధికారం, సమగ్రత, భద్రత నేపథ్యంలో చైనాకు సంబంధించిన 59 యాప్‌ లను భారత్ సోమవారం నిషేధించిన సంగతి తెలిసిందే. అయితే ఈ నిషేధాన్ని సవాలు చేస్తూ న్యాయపోరాటానికి సిద్ధమైన చైనీస్ సంస్థ టిక్ టాక్ కు మరో ఎదురుదెబ్బ తగిలింది. ఆ సంస్థ తరఫున వాదించాలంటూ మాజీ అటార్నీ జనరల్‌ ముకుల్ రోహత్గిని టిక్ టాక్ కోరగా..దాన్ని ఆయన తిరస్కరించారు. భారత ప్రభుత్వానికి వ్యతిరేకంగా చైనా యాప్‌ తరుఫున కోర్టుకు వెళ్లబోనని స్పష్టం చేశారు. దీంతో ఈ సంస్థ మరో న్యాయవాదిని వెతుక్కునే పనిలో పడింది.
ఒకసారి గతాన్ని పరిశీలిస్తే.. గతంలోనూ భారత ప్రభుత్వం ఓ సారి టిక్ టాక్ ను నిషేధించగా ఆ సంస్థ కోర్టుకెళ్లింది. తిరిగి భారత్ లో పలు నిబంధనలతో ఆ యాప్‌కు అనుమతులు ఇచ్చారు. కానీ, ఈ సారి న్యాయవాదులు ఎవరూ ఆ యాప్‌ తరఫున వాదించడానికి కూడా ముందుకు రావట్లేదు. భారత ప్రభుత్వం తీసుకున్న నిర్ణయానికి వ్యతిరేఖంగా వెళ్లొద్దని నిర్ణయించుకున్నారు. దీంతో టిక్ టాక్ కథ భారత్ లో ముగిసినట్టే అని పలువురు అభిప్రాయపడుతున్నారు.
