కోల్‌కతాలోని ఆర్జీ కర్ మెడికల్ కాలేజీలో ట్రైనీ డాక్టర్‌పై లైంగిక దాడి, హత్య కేసులో సీల్దా కోర్టు ఇటీవల నిందితుడికి జీవితఖైదు విధిస్తూ తీర్పు చెప్పిన విషయం తెలిసిందే. సీల్దా కోర్టు తీర్పు అటు బెంగాల్ ప్రభుత్వానికి, బాధిత కుటుంబానికి ఏ మాత్రం నచ్చలేదు. నిందితుడికి ఉరిశిక్ష సరైనదని ఇరువురు భావిస్తున్నారు.
ఈ క్రమంలోనే ఆర్జీకర్ ఘటనపై కొల్‌కతా హైకోర్టు కీలక ప్రకటన చేసింది. ఈ కేసుపై మరోసారి విచారణ జరుపుతామని పేర్కొంది. దానికి ముందు అందరి తరఫున వాదనలు వింటామని, ఆ తర్వాతే ప్రభుత్వం దాఖలు చేసిన అప్పీల్‌ను పరిగణలోకి తీసుకుంటామని కోర్టు స్పష్టం చేసింది. దోషిగా తేలిన సంజయ్‌ రాయ్‌, సీబీఐ, బాధిత ఫ్యామిలీ వాదనలు విన్నాకే ఆ పిటిషన్‌ను స్వీకరిస్తామని తెలిపింది. కాగా, బెంగాల్ ప్రభుత్వం హైకోర్టులో అప్పీల్ దాఖలు చేయడాన్ని సీబీఐ వ్యతిరేకించింది. కేసును విచారించిన సంస్థగా శిక్ష విషయంలో కోర్టుని ఆశ్రయించే హక్కు తమకు మాత్రమే ఉందని, ఇందులో జోక్యం చేసుకునే అధికారం ప్రభుత్వానికి లేదని వెల్లడించింది.
