టీఎస్పీఎస్సీ నిర్వహించిన డివిజనల్ అకౌంట్స్ ఆఫీసర్ రాత పరీక్షలో ఓ అభ్యర్థి ఓఎంఆర్ షీట్ను మింగి మాల్ ప్రాక్టీస్కు పాల్పడ్డాడు. ఈ ఘటన నిజామాబాద్ జిల్లా కేంద్రంలోని బోర్గాం(పీ)లోని ఉన్నత పాఠశాల పరీక్షా కేంద్రంలో చోటుచేసుకుంది. ఈ విషయంపై అధికారులు పోలీసులకు ఫిర్యాదు చేశారు. నిందితుడిని అదుపులోకి తీసుకున్నారు.
నిర్మల్ జిల్లాకు చెందిన ఓ బ్యాంకు ఉద్యోగి అబ్దుల్ ముఖీద్.. డివిజనల్ అకౌంట్స్ పరీక్షకు హాజరయ్యాడు. పరీక్షాకేంద్రంలో ఇన్విజిలేటర్ అభ్యర్థులకు ఓఎంఆర్ షీట్లను అందజేశారు. పరీక్షకు హాజరుకాని అభ్యర్థులకు కేటాయించిన స్థానాల్లోనూ పత్రాలను ఉంచారు. అప్పటికే పరీక్ష రాస్తున్న ముఖీద్ తనకు ఇచ్చిన ప్రశ్నలలో చాలా వరకు తప్పులు రాయడంతో.. గైర్హాజరైన అభ్యర్థి ఓఎంఆర్ పత్రాన్ని ఇన్విజిలేటర్కు తెలియకుండా దొంగలించాడు. దొంగలించిన ఓఎంఆర్ పత్రంతో మళ్లీ పరీక్షను రాశాడు.
ఇప్పుడు తన ఓఎంఆర్ షీట్ను ఎవరికీ తెలియకుండా అక్కడే ముక్కలు చేసి.. నమిలి మింగేశాడు. పరీక్ష సమయం అయిపోవడంతో ఇన్విజిలేటర్లు పరీక్ష పత్రాలను తీసుకునే క్రమంలో ఒక ఓఎంఆర్ షీట్ కనిపించట్లేదని గుర్తించారు. వెంటనే ఉన్నతస్థాయి అధికారులకు ఫిర్యాదు చేయడంతో ఆ ఎగ్జామ్ హాల్లోని సీసీ కెమెరాలో రికార్డు అయిన పుటేజినీ పరిశీలించగా అసలు విషయం బయటపడింది. పోలీసులకు సమాచారం అందించగా వారు అభ్యర్థిని అదుపులోకి తీసుకుని ప్రశ్నించారు. తానే ఓఎంఆర్ షీట్ను మింగినట్లు ముఖీద్ ఒప్పుకున్నాడు.
