వర్షాకాలంలో వాతావరణం చల్లగా ఉండి ఆహ్లాదకరంగా అనిపించినప్పటికీ, సోరియాసిస్తో బాధపడేవారికి మాత్రం ఇది కాస్త ఇబ్బందికరమైన సమయమే. గాలిలో తేమ, ఉష్ణోగ్రతలో తీవ్రమైన మార్పుల వల్ల ఈ సీజన్లలో సోరియాసిస్ సమస్య మరింత తీవ్రమవుతుంది. అసలు వర్షాకాలంలో ఈ సమస్య ఎందుకు పెరుగుతుంది? ఎలాంటి లక్షణాలు కనిపిస్తే అప్రమత్తంగా ఉండాలో ఇప్పుడు వివరంగా తెలుసుకుందాం.
సోరియాసిస్ అంటే ఏమిటి?: సోరియాసిస్ అనేది చర్మానికి సంబంధించి వచ్చే ఒక దీర్ఘకాలిక ఆటో ఇమ్యూన్ సమస్య. దీనివల్ల చర్మంపై ఎర్రటి మచ్చలు ఏర్పడి, తీవ్రమైన దురదతో కూడిన పొలుసులు వస్తుంటాయి. ఇక వేసవి, చలికాలంలో కాస్త అదుపులో ఉన్నట్లు అనిపించినా, వర్షాకాలంలో వాతావరణ మార్పుల వల్ల ఈ సమస్య ప్రభావం మరింతగా పెరుగుతుంది.
వర్షాకాలంలో వ్యాధి ముదరడానికి కారణాలు: వర్షాకాలంలో బయట చల్లగా ఉండి, ఇంట్లోకి రాగానే వెచ్చగా ఉండటం వల్ల చర్మంలోని తేమ తగ్గిపోయి పొడిబారుతుంది. అలాగే ఈ సీజన్లో ఆకాశం మబ్బుపట్టి సూర్యరశ్మి సరిగ్గా అందదు. ఇక సూర్యరశ్మిలోని విటమిన్ డి చర్మ కణాలు అతివేగంగా పెరగకుండా కంట్రోల్ చేస్తుంది. ఎండ తగలకపోవడం వల్ల శరీరంలో విటమిన్ డి తగ్గి, మచ్చలు దట్టంగా మారతాయి.
పొలుసులు, విపరీతమైన దురద, మంట: ఈ సమయంలో చర్మంపై ఎర్రటి మచ్చలు ఏర్పడి వాటిపై వెండి-తెలుపు రంగులో పొలుసులుగా మారుతాయి. ఇక చర్మం పొడిబారడం వల్ల విపరీతమైన దురద, మంట, చిన్నగా కుడుతున్నట్లు అనిపిస్తుంది. చర్మాన్ని రుద్దడం వల్ల మచ్చలు మరింత విస్తరించే ప్రమాదం ఉంది.
పగిలిన చర్మం మరియు గోళ్లలో మార్పులు: చర్మానికి తేమ అందక బిగుసుకుపోయి పగుళ్లు ఏర్పడతాయి. కొన్నిసార్లు ఈ పగుళ్ల నుండి రక్తం కారడం కూడా జరుగుతుంది. ఇక అంతేకాకుండా చేతులు, కాళ్ల గోళ్లు రంగు మారడం, పచ్చగా కావడం, చిన్న గుంటలు పడటం లేదా పెళుసుగా మారి ఊడిపోవడం వంటి మార్పులు కనిపిస్తాయి.
వర్షాకాలంలో వచ్చే వాతావరణ మార్పులు సోరియాసిస్ బాధితులకు కాస్త కష్టాన్ని కలిగిస్తాయి. కాబట్టి ఈ సమయంలో చర్మాన్ని ఎప్పుడూ పొడిగా ఉంచుకోకుండా తగినంత తేమ (మాయిశ్చరైజర్) అందిస్తూ జాగ్రత్తపడాలి. లక్షణాలు తీవ్రమవుతున్నాయని అనిపిస్తే అస్సలు నిర్లక్ష్యం చేయకూడదు.
గమనిక: ఈ సమాచారం కేవలం మీ అవగాహన కోసం మాత్రమే ఇవ్వబడింది. సోరియాసిస్ తీవ్రత పెరిగినా లేదా కొత్త లక్షణాలు కనిపించినా సొంత వైద్యం చేసుకోకుండా వెంటనే చర్మ వైద్యుడిని (డెర్మటాలజిస్ట్) సంప్రదించి సరైన చికిత్స తీసుకోవడం చాలా ముఖ్యం.
