మౌని అమావాస్య సందర్భంగా దేశవ్యాప్తంగా భక్తులు పుణ్యస్నానాలను ఆచరిస్తున్నారు. ఈ రోజున త్రివేణి సంగమం (మూడు నదులు కలిసే చోట) పుణ్యస్నానాలు ఆచరిస్తే మంచి జరుగుతుందని భక్తుల అపార నమ్మకం. ఎన్నో జన్మల పుణ్యఫలం సిద్ధిస్తుందని భక్తులు నమ్ముతుంటారు.
ఈ నేపథ్యంలోనే మహాకుంభమేళాలోనే కాకుండా దేశవ్యాప్తంగా ఉన్న నదుల్లో భక్తులు పుణ్య స్నానాలు చేస్తుంటారు. తెలుగు రాష్ట్రాలతో పాటు ఇతర రాష్ట్రాల్లోని నదుల్లోనూ పుణ్యస్నానాలు చేస్తుంటారు. తమిళనాడులోని తామరి భరణి, మధ్యప్రదేశ్‌లోని పిప్రా, హరిద్వార్‌లోని గంగా నదిలో పుణ్యస్నానాల కోసం అధికారులు ప్రత్యేక ఏర్పాట్లు చేసినట్లు తెలుస్తోంది. తెలుగు రాష్ట్రాల్లోనూ భక్తులు గోదావరి, కృష్ణా నదిలో పుణ్యస్నానాలు ఆచరిస్తున్నారు.
