మన దేశంలో ఇప్పటికే సుమారు నాలుగు వేలకుపైగా నగరాలు ఉన్నాయి. అయితే త్వరలో మరో ఎనిమిది కొత్త నగరాలు పెరగనున్నాయట. అదేంటనుకుంటున్నారా.. జనాభా భారాన్ని తగ్గించే దిశగా ఆలోచిస్తున్న కేంద్ర ప్రభుత్వం.. దేశంలో కొత్తగా ఎనిమిది నగరాలు ఏర్పాటు చేయాలని యోచిస్తోందని ఓ సీనియర్ అధికారి తెలిపారు.
మధ్యప్రదేశ్ ఇండోర్లో ఇవాళ ‘అర్బన్ 20’ సమావేశం తర్వాత కేంద్ర పట్టణ వ్యవహారాలు, గృహ నిర్మాణ శాఖ జీ20 యూనిట్ డైరెక్టర్ ఎంబీ సింగ్ మీడియాతో మాట్లాడారు. 15వ ఆర్థిక సంఘం తన నివేదికలో కొత్త నగరాలను అభివృద్ధి చేయాలని సిఫార్సు చేసిందని ఆయన తెలిపారు. “ఫైనాన్స్ కమిషన్ సిఫార్సు తర్వాత.. పలు రాష్ట్రాలు 26 కొత్త నగరాల కోసం కేంద్ర ప్రభుత్వానికి ప్రతిపాదనలు పంపాయి. ఆ తర్వాత ఎనిమిది కొత్త నగరాల ఏర్పాటుకు అధికారులు పరిశీలిస్తున్నారు” అని ఎంబీ సింగ్ చెప్పారు. కొత్త నగరాల ఏర్పాటుకు చెందిన పూర్తి సమాచారాన్ని కేంద్ర ప్రభుత్వం త్వరలోనే ప్రకటిస్తుందని ఎంబీ సింగ్ తెలిపారు.
