ప్రధాన మంత్రి నరేంద్ర మోదీ సాహిత్యం అందించిన ఓ పాట గ్రామీ పురస్కారానికి ఎంపికైంది. ప్రపంచవ్యాప్తంగా 2023 ఏడాదిని తృణధాన్యాల సంవత్సరం జరుపుకుంటున్న నేపథ్యంలో.. తృణధాన్యాల ప్రాధాన్యత, లాభాలను వివరిస్తూ రూపొందించిన ‘అబండెన్స్‌ ఇన్‌ మిల్లెట్స్‌’ పాటను మోదీ గత జూన్లో విడుదల చేసిన విషయం తెలిసిందే. ఈ పాటను ఇండో-అమెరికన్‌ గాయని ఫాల్గుణి షా(ఫాలూ) ఆమె భర్త గౌరవ్ షా కలిసి రూపొందించారు.
ఈ సాంగ్కు సాహిత్యంలో ప్రధాని సహకారం అందించారు. ఈ పాట హిందీ, ఇంగ్లీష్‌ భాషల్లో విడుదల చేయగా.. ఈ పాటకు సంగీత రంగంలో ప్రతిష్ఠాత్మకంగా భావించే గ్రామీ అవార్డు బెస్ట్‌ గ్లోబల్‌ మ్యూజిక్‌ పర్‌ఫామెన్స్‌ కేటగిరీలో నామినేట్‌ అయింది. ఈ సాంగ్ను రూపొందించిన ఫాల్గుణి షా 2022లో గ్రామీ అవార్డు గెలుచుకున్నారు. ఈ సందర్భంగా ఆమె ప్రధాని మోదీని కలిశారు. ప్రపంచ వ్యాప్తంగా ఉన్న ఆకలి నిర్మూలన కోసం ఒక పాట రాయాలని ఫాల్గుణి షా దంపతులకు మోదీ సూచించడంతో.. ఆయన్ను కూడా పాటలో భాగమవ్వాలని ఫాల్గుని, గౌరవ్ షా కోరగా మోదీ సానుకూలంగా స్పందించారు.
