భారత్‌తో పెట్టుకుంటే ఎలా ఉంటుందో ప్రపంచ దేశాలకు మాల్దీవ్స్ వ్యవహారం చూస్తే తెలిసివస్తోంది. మోదీ ఒక్క ట్వీట్ ఆ దేశాధ్యక్షుడి పీఠాన్నే కదిలిస్తోంది. ఆ దేశ ముగ్గురు మంత్రులు ప్రదర్శించిన నోటి దురుసుతో ఇప్పుడు ఆ దేశ అధ్యక్షుడి పదవికే ఎసరొచ్చింది. ఇప్పటికే మాల్దీవ్స్ వెళ్లే భారతీయ పర్యాటకుల సంఖ్య గణనీయంగా పడిపోగా, పర్యాటక ఆదాయం తగ్గుతోందని ఆ దేశం గగ్గోలు పెడుతోంది.
బాయ్‌కాట్‌ మాల్దీవ్స్ నినాదం ప్రపంచవ్యాప్తంగా మార్మోగుతున్న వేళ ఆ దేశ అధికార, ప్రతిపక్ష నాయకులు తీవ్ర ఆందోళన వ్యక్తం చేస్తున్నారు. ఏకంగా తమ అధ్యక్షుడు మహ్మద్ ముయిజ్జుపై అవిశ్వాస తీర్మానం ప్రవేశపెట్టేందుకు రెడీ అవుతున్నారు. ఈ క్రమంలో అవిశ్వాస తీర్మానం చేపట్టేలా చర్యలు తీసుకోవాలని ఆ దేశ పార్లమెంటరీ మైనారిటీ నాయకుడు అలీ అజీమ్ కోరారు. అవిశ్వాస తీర్మానం పెట్టాలని సభ్యులకు పిలుపునిచ్చారు. అధ్యక్షుడు మహ్మద్ ముయిజ్జును అధికారం నుంచి తొలగించడానికి అవసరమైన అన్ని చర్యలను తీసుకోవడానికి సిద్ధంగా ఉన్నారా అని ఆయన ప్రశ్నించారు.
