గుజరాత్ గాంధీనగర్ లో పర్యటించిన ప్రధాని మోదీ ‘మిషన్‌ డిఫ్‌స్పేస్‌’ అనే కార్యక్రమాన్ని ప్రారంభించారు. అంతరిక్షానికి సంబంధించిన రక్షణ ఏర్పాట్ల కోసం దీనిని మొదలుపెట్టారు. అంతరిక్ష విభాగంలో ఇండియా రక్షణ దళాలకు అవసరాలను తీర్చేందుకు సృజనాత్మక పరిష్కారాలు కనుగొనేందుకు దీనిని ఏర్పాటు చేశారు. నేటి నుంచి గాంధీనగర్‌లో మొదలైన డిఫెన్స్‌ ఎక్స్‌పో అక్టోబర్‌ 22వ తేదీ వరకు కొనసాగనుంది.
మరోవైపు గుజరాత్‌లోని గాంధీనగర్‌లో డిఫెన్స్‌ ఎక్స్‌పో-2022ను మోదీ ప్రారంభించారు. భారతీయుల వ్యాపార నైపుణ్యాలపై ప్రపంచానికి ఉన్న నమ్మకాన్ని ఇది బలోపేతం చేస్తుందని ప్రధాని మోదీ పేర్కొన్నారు. భారత్‌ ఆఫ్రికా దేశాల మధ్య బంధాన్ని బలోపేతం చేయడానికి ఈ కార్యక్రమం దోహదపడుతుందన్నారు. భారత్‌-పాక్‌ సరిహద్దులకు సమీపంలోని దీసా వద్ద త్వరలో ఏర్పాటు కానున్న వాయుసేన స్థావరం దేశ రక్షణలో కీలకంగా మారుతుందని మోదీ అన్నారు.
దాదాపు రూ.1000 కోట్ల వ్యయంతో ఉత్తర గుజరాత్‌లోని బనాసకంఠ జిల్లాలో దీసా వద్ద వాయుసేన నిర్మిస్తున్న స్థావరానికి ప్రధాని వర్చ్యూవల్‌ విధానంలో భూమిపూజ చేశారు. భారత దళాలు సమాంతరంగా గగనతల, సముద్ర ఆపరేషన్లు నిర్వహంచేందుకు ఈ స్థావరం అవకాశం కల్పిస్తుంది. విదేశీదాడులకు వేగంగా స్పందించడానికి వీలు లభిస్తుంది. ఈ ప్రాజెక్టు 21 నెలల్లో పూర్తికానుంది.
