ఈ నెల 4, 5వ తేదీల్లో ప్రధాన మంత్రి నరేంద్ర మోడీ తెలంగాణ రాష్ట్రంలో పర్యటించనున్నారు. పలు అభివృద్ధి కార్యక్రమాలకు శంకుస్థాపనలు చేయడంతో రాజకీయ సభల్లోనూ పాల్గొనున్నారు. అయితే, సీఎం రేవంత్రెడ్డి ప్రోటోకాల్ పాటిస్తారా? లేదా కేసీఆర్ బాటలో నడుస్తారా? అనే అంశం ఆసక్తికరంగా మారింది.
ప్రధాన మంత్రి పర్యటన సమయంలో ప్రోటోకాల్ ప్రకారం ఆహ్వానాలు ఉంటాయి. గవర్నర్, సీఎం, అధికారులు స్వాగతం పలకడం సంప్రదాయం.
బీజేపీతో సత్సంబంధాలు ఉన్నంత కాలం బీఆర్ఎస్ అధినేత కేసీఆర్ ఈ సంప్రదాయాలను పాటించారు. బీఆర్ఎస్ రెండోసారి అధికారంలోకి వచ్చిన తర్వాత బీజేపీతో సంబంధాలు బెడిసి కొట్టాయి. ప్రధాని మోడీ ఎప్పుడు రాష్ట్ర పర్యటనకు వచ్చినా సీఎం కేసీఆర్ ఆహ్వానం పలకలేదు. మంత్రి తలసాని శ్రీనివాస్ యాదవ్ మాత్రమే వెళ్లి ప్రధానికి స్వాగతం పలికేవారు. గవర్నర్తో సైతం ప్రోటోకాల్ విషయంలో పెద్ద రాద్దాంతమే జరిగిన విషయం తెలిసిందే.
రాష్ట్రంలో అధికార మార్పిడి జరిగింది. కేసీఆర్కు భిన్నంగా రేవంత్రెడ్డి నడుచుకుంటున్నారు. సీఎంగా బాధ్యతలు చేపట్టిన వెంటనే గవర్నర్ను కలవడం ఆ తర్వాత ఢిల్లీ వెళ్లి ప్రధాన మంత్రి, కేంద్ర హోంమంత్రుల సైతం భేటీ అయ్యారు.
ప్రస్తుతం దేశంలో ఎన్నికల వాతావరణం నెలకొంది. దీనిని దృష్టిలో పెట్టుకొనే ప్రధాన మంత్రి రాష్ట్రంలో పర్యటిస్తున్నారు. 4న ఆదిలాబాద్లో రూ.6600 కోట్ల పనులకు శంకుస్థాపనతోపాటు బహిరంగ సభలో ప్రసంగించనున్నారు. 5న సంగారెడ్డిలో 9 వేల కోట్లతో అభివృద్ధి కార్యక్రమాలు, బహిరంగ సభలో మోదీ ప్రసంగించనున్నారు. ఈ నేపథ్యంలో సీఎం రేవంత్రెడ్డి ప్రధానికి స్వాగతం పలుకుతారా లేక కేసీఆర్ బాటలో నడుస్తారా అనే విషయం ఆసక్తి నెలకొంది.
