ఉమ్మడి ఆంధ్రప్రదేశ్‌ విడిపోయి పదేళ్లు పూర్తయ్యింది. అయితే విభజన సమస్యలు ఇంకా పెండింగ్‌లోనే ఉన్నాయి. వీటి పరిష్కారం దిశగా రెండు రాష్ట్రాల ముఖ్యమంత్రులు చంద్రబాబు, రేవంత్ నడుంబిగించారు. విభజన సమస్యలు పదేళ్లుగా పెండింగులో ఉన్నాయి. వాటి మీద చర్చించేందుకు ముఖా ముఖీ భేటీ అవసరమే. కానీ ఏపీ సీఎం చంద్రబాబు, తెలంగాణా సీఎం రేవంత్ రెడ్డిల భేటీ విషయంలో తెలంగాణా కాంగ్రెస్‌లో పెద్ద ఎత్తున చర్చ సాగుతోంది. అది పాజిటివ్‌గా కాదు నెగిటివ్‌గానే ఉంది.
దానికి కారణం రేవంత్ రెడ్డి పూర్వాశ్రమం అంతా టీడీపీతో ముడిపడి ఉండడం. అంతే కాదు చంద్రబాబు రేవంత్ రెడ్డి ఓటుకు నోటు కేసులో ఉండడం. వీటితో పాటు అతి కీలకమైన అంశం ఏమిటి అంటే రేవంత్ రెడ్డి ద్వారా చంద్రబాబు తెలంగాణా మీద ఆంధ్రా పెత్తనం చలాయిస్తారు అని విపక్షంలో ఉన్న బీఆర్ఎస్ అధినేత కేసీఆర్ అడ్వాంటేజ్‌గా ఎక్కడ తీసుకుంటారో అన్న ఆందోళన వ్యక్తం అవుతోంది. చంద్రబాబు ఎన్డీయేలో ఉన్నారు. ఆయన అత్యంత కీలకంగా ఉన్నారు. ఇక కాంగ్రెస్ ముఖ్యమంత్రి రేవంత్ రెడ్డి. కాంగ్రెస్ ఎన్డీయేకు బద్ధ వ్యతిరేకి. కాంగ్రెస్ ఇండియా కూటమిలో ఉంది.ఇది రాజకీయంగా చూస్తే ఒక భిన్నమైన వాతావరణాన్ని సూచిస్తోంది. మరో వైపు చూస్తే విభజన హామీల విషయం తీసుకుంటే రెండు రాష్ట్రాలు పట్టుదల మీదనే ఉంటాయి. అలాంటప్పుడు ఈ మీటింగ్ వల్ల ఉపయోగం ఏమిటి అన్న చర్చ నడుస్తోంది.
ఇక.. చంద్రబాబు టీడీపీ తెలంగాణాలో ఉంది. ఆయన రాజకీయంగా బలపడేందుకు చూస్తారు. పైగా భావోద్వేగాలని రెచ్చగొట్టి ఆంధ్రా సెంటిమెంట్‌ని రాజేసేందుకు బీఆర్ఎస్ అధినేత కేసీఆర్ రెడీగా ఉన్నారు. ఇది తెలంగాణాలో కాంగ్రెస్ పొలిటికల్ స్ట్రాటజీ పరంగా అసలు మంచిది కాదు అని కాంగ్రెస్ కొందరు నేతలు పూర్తి స్థాయిలో వ్యతిరేకిస్తున్నారు. చంద్రబాబు రేవంత్ రెడ్డి భేటీ ద్వారా తెలంగాణకి అయితే వచ్చే లాభం ఏమి ఉంటుందో తెలియదు కానీ కేసీఆర్‌ని తట్టి లేపినట్లు అవుతుందని కాంగ్రెస్ ఎమ్మెల్యేలలో సైతం అలజడి రేగుతోంది అని అంటున్నారు. ఇక ఇద్దరు నేతలూ ఓటుకి నోటు కేసులో ఉన్నారు. కాబట్టి అసలు చర్చ రెండు రాష్ట్రాల ప్రయోజనాల కంటే సొంత ప్రయోజనాల అన్న చర్చ కూడా సాగుతోందట.
ఏది ఏమైనా కేంద్రం పెద్దన్నగా ఉండి రెండు రాష్ట్రాల మధ్య విభజన సమస్యలను తీర్చాలి. అలా జరిగితే బాగుంటుంది. అపుడు రెండు రాష్ట్రాలకు న్యాయం జరుగుతుంది అని అంటున్నారు. అలా కాకుండా ఒకే స్టేచర్ కలిగి ఎవరి స్టేట్ కి వారు అధిపతులుగా ఉంటూ జరిపే ఈ భేటీలో తేలేది ఏమి ఉంటుందని అంటున్నారు మరికొందరు. తెలంగాణా ఏపీకి బకాయిలు చాలా పడింది. వాటిని కేసీఆర్ పదేళ్ల కాలంలో ఇవ్వలేదు అనేక కారణాలు చెప్పుకొచ్చారు. ఇపుడు వాటిని రేవంత్ రెడ్డి ఆమోదిస్తే అపుడు బీఆర్ఎస్ నుంచి నిరసన మొదలవుతుంది. అలాగే ఆస్తుల పంపకంలోనూ ఎన్నో వాదనలు అటూ ఇటూ ఉన్నాయి. ఇదే విధంగా అనేక ఇతర సమస్యల వెనక సెంటిమెంట్లూ ఉన్నాయి.
వీటిని పరిగణనలోకి తీసుకోకుండా హామీలు ఇచ్చి వస్తే అది రేవంత్ రెడ్డికే కాదు కాంగ్రెస్‌కి కూడా దెబ్బ పడుతుందని అంటున్నారు రాజకీయ విశ్లేషకులు. ఏది ఏమైనా ఈ భేటీ వల్ల చంద్రబాబు, రేవంత్ రెడ్డి సాధించేది ఏమీ ఉండదని అంటున్నారు. చూడాలి మరి.. మున్మందు ఈ వ్యవహారం ఎటు దారితీయనుందో?
