సీఎం రేవంత్రెడ్డి, బీఆర్ఎస్ వర్కింగ్ ప్రెసిడెంట్ కేటీఆర్ మధ్య మాటల యుద్ధం కొనసాగుతోంది. సవాల్కు ప్రతి సవాల్ విసురుకుంటూ బస్తీమే సవాల్ అంటున్నారు. వచ్చే లోక్సభ ఎన్నికల్లో ఒక్క సీటైనా గెలవాలని రేవంత్రెడ్డి బీఆర్ఎస్ వర్కింగ్ ప్రెసిడెంట్కు సవాల్ విసిరారు. ఇందుకు కేటీఆర్ దీటుగా స్పందించారు. ‘కొడంగల్ ఎమ్మెల్యే స్థానానికి, సీఎం పదవికి రేవంత్రెడ్డి రాజీనామా చేయాలి. నేను సిరిసిల్లలో రాజీనామా చేస్తా. వచ్చే ఎన్నికల్లో మల్కాజ్గిరి ఎంపీ స్థానం నుంచి పోటీ చేద్దాం. ఎవరు గెలుస్తారో చూద్దాం అంటూ’ కేటీఆర్ ప్రతి సవాల్ విసరిరారు. మల్కాజ్ గిరి కాంగ్రెస్ సిట్టింగ్ స్థానం కావడం, అదీ సీఎం రేవంత్రెడ్డి ప్రాతినిధ్యం వహించిన నియోజకవర్గం కావడంతో సార్వత్రా ఆసక్తి నెలకొంది.
2002లో ఏర్పాటైన డీలిమిటేషన్ కమిటీ సిఫారసుల ఆధారంగా 2008లో మల్కాజ్గిరి ఎంపీ స్థానం మనుగడలోకి వచ్చింది. 2009లో జరిగిన తొలి ఎన్నికల్లో కాంగ్రెస్ అభ్యర్థి సర్వే సత్యనారాయణ విజయం సాధించారు. 2014లో టీడీపీ నుంచి పోటీ చేసిన మల్లారెడ్డి గెలుపొందారు. 2019లో రేవంత్రెడ్డి విజయం సాధించారు.
దేశంలోనే అతిపెద్ద నియోజకవర్గం మల్కాజ్గిరి. ఇక్కడ దాదాపు 16 లక్షలకుపైగా ఓట్లున్నాయి. ఇక్కడ సెటిలర్ల ఓట్లు భారీ సంఖ్యలో ఉన్నాయి. ఈ నేపథ్యంలో మల్కాజ్గిరి నుంచి విజయం సాధించడం అంత ఆషామాషీ కాదు. గత ఎన్నికల్లో గెలిచిన రేవంత్రెడ్డి కేవలం 10,919 ఓట్ల తేడాతో విజయం సాధించాడంటేనే పరిస్థితిని అర్థం చేసుకోవచ్చు.
గత అసెంబ్లీ ఎన్నికల్లో ఓటమిపాలైన భారతీయ రాష్ట్ర సమితి గ్రేటర్ హైదరాబాద్లో మాత్రం మంచి ఫలితాలను సాధించింది. ముఖ్యంగా మల్కాజ్గిరి పార్లమెంట్ పరిధిలోని ఏడు అసెంబ్లీ సెగ్మెట్లలోనూ విజయం సాధించింది. మేడ్చల్, మల్కాజ్గిరి, కుత్బుల్లాపూర్, కూకట్పల్లి, ఉప్పల్, ఎల్ బీనగర్, సికింద్రాబాద్ కంటోన్మెంట్ స్థానాలను కైవసం చేసుకుంది. ముఖ్యంగా కూతుబుల్లాపూర్ సిట్టింగ్ అభ్యర్థి 85 వేలకు పైగా ఓట్ల తేడాతో విజయం సాధించడం గమనార్హం. ఈ నేపథ్యంలో వచ్చే సార్వత్రిక ఎన్నికల్లో మల్కాజ్గిరి నుంచి కచ్చితంగా గెలుస్తామనే ధీమాలో బీఆర్ఎస్ ఉంది. ఈ ధీమాతో రేవంత్రెడ్డిక సవాల్ విసిరినట్లు తెలుస్తోంది.
