మంత్రి కేటీఆర్ జన్మదినం సందర్భంగా గిఫ్ట్ ఏ స్మైల్ కార్యక్రమంలో భాగంగా వికలాంగులకు మూడు చక్రాల వాహనాలు అందించేందుకు పలువురు ప్రజాప్రతినిధులు ముందుకు వచ్చారు. ఈ సందర్భంగా నెక్లెస్ రోడ్ లోని జలవిహార్ లో లబ్ధిదారులకు మంత్రి కేటీఆర్ చేతుల మీదుగా త్రిచక్ర వాహనాలను అంద జేశారు. ఈ సందర్భంగా మంత్రి కేటీఆర్ మాట్లాడుతూ.. రాజకీయాల్లో ఉన్నప్పుడు డబ్బులు ఎక్కువ ఖర్చు చేస్తామని.. అనవసర ఖర్చులు కూడా చేయాల్సి వస్తుంటదన్నారు.
బ్యానర్లు, హోర్డింగ్స్ పెట్టి వృధా ఖర్చు చేస్తామని.. దాన్ని తగ్గించుకోవాలని ఈ ఆలోచన చేశామని తెలిపారు. మనకు ఆత్మ సంతృప్తి ఇచ్చే కార్యక్రమంలో భాగంగానే గిఫ్ ఏ స్మైల్ నిర్వహిస్తున్నామని వెల్లడించారు. కోవిడ్ సందర్భంగా వృధా ఖర్చులు పెట్టొద్దని గత సంవత్సరం నా పుట్టినరోజు సందర్భంగా వంద అంబులెన్స్ లు వితరణ చేశామన్నారు. ఈ సంవత్సరం వెయ్యి మోటార్ సైకిళ్లు అంగవైకల్యం ఉన్న వారికి అందించామని.. టిఆర్ఎస్ ప్రజాప్రతినిధులు స్వతహాగా ముందుకు వచ్చి ఇబ్బందుల్లో ఉన్నవారికి సహాయం చేస్తున్నారని తెలిపారు. త్రిచక్ర వాహనం ద్వారా జీవనోపాధికి కూడా ఉపయోగ పడుతుందని అభిప్రాయపడ్డారు.
