తాజాగా ఆంధ్రప్రదేశ్ ముఖ్యమంత్రి జగన్ మోహన్ రెడ్డికి సిపిఐ నేత రామకృష్ణ లేఖ రాశారు. పోలవరం నిర్వాసితులకు ఒక్కో కుటుంబానికి రూ. 10 లక్షల పరిహారం ఇవ్వాలని ఆయన లేక పూర్వకంగా డిమాండ్ చేశారు. వీటితో పాటు 2006 – 07 సంవత్సరంలో ఎకరాకు రూ. ఒక లక్ష 15000 తీసుకున్న వారందరికీ, మళ్లీ ఎకరాకు రూ. 5 లక్షల రూపాయలు చెల్లించాలని కోరారు. అంతేకాకుండా నిర్వాసితులకు 18 సంవత్సరాలు నిండిన ప్రతి యువతీయువకులకు ఆర్ అండ్ ఆర్ ప్యాకేజీ అందించాలని ఆయన తెలిపారు.
ఈ విషయంలో కటాఫ్ డేట్ తో సంబంధం లేకుండా 18 సంవత్సరాలు నిండిన ప్రతి వారికి వర్తింపజేయాలని ఆయన తెలిపారు. అలాగే పునరావాస కేంద్రాల్లో మౌలిక సదుపాయాలు కల్పించడంతోపాటు వారందరినీ పూర్తి పరిహారం అందించిన తర్వాత వారిని అక్కడి నుంచి తరలించాలని తెలిపారు. ఆ తర్వాత మిగులు భూములను సర్వే చేసిన అనంతరం వారందరికీ నష్ట పరిహారం అందజేయాలని ప్రతి నిర్వాసిత కుటుంబానికి కచ్చితంగా ఉద్యోగం కల్పించాలని రామకృష్ణ జగన్ కు రాసిన లేఖలో డిమాండ్ చేశారు.
