మీడియా ముసుగులో గంజాయి సరఫరా చేస్తున్న ఇద్దరు వ్యక్తులను నార్కోటిక్ పోలీసులు అదుపులోకి తీసుకున్నారు. గంజాయి అక్రమ రవాణా కోసం కారుకు ప్రెస్‌ స్టిక్కర్ అంటించి గుట్టుగా తరలించే ప్రయత్నం చేశారు. దీని గురించి ముందస్తు సమాచారం అందుకున్న నార్కోటిక్స్ అధికారులు ముందుగానే వారు ప్రయాణించే దారిలో నిఘా పెట్టారు.
ఈ క్రమంలోనే బ్రిడ్జి పాయింట్ చెక్ పోస్ట్ వద్ద భద్రాచలం నుంచి బూర్గంపాడు వైపు వెళ్తున్న కారులో తనిఖీలు నిర్వహించారు. కారులో 80 కేజీల గంజాయిని అధికారులు స్వాధీనం చేసుకున్నారు. గంజాయి రవాణా చేస్తున్న ఇద్దరు వ్యక్తులను సైతం అదుపులోకి తీసుకున్నారు.మరొక వ్యక్తి అధికారులను చూసి పారిపోయినట్లు తెలిసింది. పట్టుబడిన వ్యక్తులు బూర్గంపహాడ్ మండలంలో పత్రికా విలేకరులుగా తెలుస్తోంది. పట్టుబడిన గంజాయి విలువ రూ.40 లక్షలు ఉంటుందని సమాచారం. అనంతరం నిందితులను పోలీసులకు హ్యాండోవర్ చేయగా.. వారే కేసు నమోదు చేసి దర్యాప్తు చేస్తున్నారు.
