తనపై నమోదైన ఫార్ములా – ఈ కేసుపై గురువారం రాత్రి కీలక వ్యాఖ్యలు చేశారు బీఆర్ఎస్ వర్కింగ్ ప్రెసిడెంట్ కేటీఆర్. కొడంగల్ మాజీ ఎమ్మెల్యే పట్నం నరేందర్ రెడ్డి, లగచర్ల రైతులు జైలు నుంచి విడుదలైన సందర్భంగా తెలంగాణ భవన్ లో ఏర్పాటు చేసిన మీడియా సమావేశంలో కేటీఆర్ మాట్లాడుతూ.. ఇందులో రేవంత్ రెడ్డి శాడిస్ట్ మెంటాలిటీ తప్ప మరేమీ లేదని అన్నారు.
కుంభకోణం, లంబకోణం అంటూ డ్రామాలు చేస్తున్నారని.. కానీ దీనిపై అసెంబ్లీలో చర్చకు రమ్మంటే మాత్రం రావడం లేదని ఆగ్రహం వ్యక్తం చేశారు. చంద్రబాబు నాయుడే ఎఫ్ – 1 రేసును తీసుకురావాలని ప్రయత్నాలు చేశారని గుర్తు చేశారు. హైదరాబాద్ ని ప్రపంచ పటంలో ఉంచడమే తాను చేసిన తప్పా..? అని నిలదీశారు.
“ఈ రేస్ కి 150 కోట్లు ఖర్చు చేస్తే.. 700 కోట్ల లాభం వచ్చింది. ఈవెంట్ తో ప్రపంచం దృష్టిని ఆకర్షించాలి అనుకున్నాం. ఎలాన్ మస్క్ తీసుకువద్దాం అనుకున్నాం. ఈ ఈవెంట్ ని హెచ్ఎండిఏ దగ్గర ఉండి చూసుకోండి. రేస్ కు ఖర్చు మొత్తం హెచ్ఎండిఏ పెట్టింది. హైదరాబాద్ లో జరిగే ఏ కార్యక్రమమైనా హెచ్ఎండిఏ దగ్గరుండి చూసుకుంటుంది. ఇందులో తప్పు జరిగిందని నిరూపించగలరా..?” అని ప్రశ్నించారు కేటీఆర్.
