మెదక్ జిల్లా శివంపేటలో ఘోర రోడ్డు ప్రమాదం చోటు చేసుకుంది. బుధవారం కారు అదుపు తప్పి కల్వర్టును ఢీ కొని రత్నాపూర్ వద్ద కాలువలోకి దూసుకెళ్లింది. ఈ ప్రమాదంలో కారులో ప్రయాణిస్తున్న ఏడుగురు అక్కడికక్కడే మృతి చెందారు. డ్రైవర్ మాత్రం తీవ్ర గాయాలతో బయటపడ్డాడు. ఉసిరికపల్లి నుంచి వెల్దుర్తి వరకు రోడ్డు విస్తరణ పనులు జరుగుతుండగా.. వేగంగా వచ్చిన ఆ కారు.. రహదారి పై ఉన్న గుంతలో పడటంతో అదుపు తప్పి ఆ తర్వాత ప్రమాదానికి గురైనట్లు తెలుస్తోంది. వేగంగా వెళ్తున్న కారు ఒక్కసారిగా రోడ్డుపై ఉన్న గుంతలో పడటంతో గాల్లోకి ఎగిరి రహదారి పక్కకు దూసుకెళ్లినట్టు సమాచారం.
ఈ ప్రమాదం జరగడం గమనించిన స్తానికులు కారును వెలికితీసి డ్రైవర్ ను ఆసుపత్రికి తరలించారు. ఈ విషయం తెలుసుకున్న పోలీసులు హుటాహుటిన సంఘటన స్థలానికి చేరుకున్నారు. మృతులు రత్నాపూర్, తాళ్లపల్లి, పాముతండా వాసులుగా గుర్తించారు. మరణించిన వారిలో ఒక వ్యక్తి, నలుగురు మహిళలు, ఇద్దరూ బాలికలు ఉన్నారు. పోలీసులు కేసు నమోదు చేసుకొని దర్యాప్తు చేపడుతున్నారు.
