HMPV వైరస్ పై తెలంగాణ సర్కార్‌ కీలక ప్రకటన చేసింది. ఇది కొత్తది కాదంటూ ఆరోగ్యశాఖ మంత్రి దామోదర రాజనర్సింహ క్లారిటీ ఇచ్చారు. Human MetaPneumoVirus (HMPV) అనేది కొత్త వైరస్ కాదు..2001లోనే ఈ వైరస్ ఉనికిని కనుగొన్నారని వెల్లడించారు. నాటి నుంచే ప్రపంచవ్యాప్తంగా ఈ వైరస్ వ్యాప్తిలో ఉందని… ఈ వైరస్ శ్వాసకోశ వ్యవస్థపై స్వల్ప ప్రభావం చూపిస్తుందని పేర్కొన్నారు.
వ్యాధి సోకిన వ్యక్తి దగ్గినప్పుడు, తుమ్మినప్పుడు అతని నోటి నుంచి వచ్చే తుంపర్ల ద్వారా మరొకరికి వైరస్ వ్యాపిస్తుందని… చైనాలో ఈ సంవత్సరం HMPV కేసులు ఎక్కువ సంఖ్యలో నమోదవుతున్నట్టు తెలుస్తోందని వివరించారు. ఇతర దేశాల్లో, ఇతర రాష్ట్రాల్లో ఎప్పటికప్పుడు పరిస్థితిని సమీక్షిస్తున్నామని..ప్రకటించారు.
కేంద్ర ఆరోగ్యశాఖ అధికారులతో, మన రాష్ట్ర ఆరోగ్యశాఖ అధికారులు రెగ్యులర్‌‌గా కోఆర్డినేట్ చేసుకుంటున్నారన్నారు ఆరోగ్యశాఖ మంత్రి దామోదర రాజనర్సింహ. ఈ వైరస్ విషయంలో ప్రస్తుతానికి భయపడాల్సిన అవసరం లేదు. జాగ్రత్తగా ఉంటే సరిపోతుందని… రాష్ట్రంలో అన్ని రకాల వైద్య సదుపాయాలు అందుబాటులో ఉన్నాయన్నారు. ఎటువంటి పరిస్థితిని అయినా ఎదుర్కొనేందుకు ప్రభుత్వం, వైద్యారోగ్య శాఖ సిద్ధంగా ఉందని వివరించారు ఆరోగ్యశాఖ మంత్రి దామోదర రాజనర్సింహ.
