ప్రపంచంలో ఏ దేశంలో లేనంతగా భారతదేశంలో యువత ఉందని తెదేపా జాతీయ అధ్యక్షుడు చంద్రబాబు నాయుడు అన్నారు. అందుకే మన దేశాన్ని యంగ్ ఇండియా అంటారని గుర్తుచేశారు. ఈ యువశక్తిని మొత్తంగా వినియోగిస్తే ప్రపంచంలోనే ఇండియా నంబర్ వన్ గా నిలుస్తుందని తెలిపారు.
హైదరాబాద్లోని ఎన్టీఆర్ ట్రస్ట్ భవన్లో నిర్వహించిన అజాదీ కా అమృత్ మహోత్సవాలల్లో చంద్రబాబునాయుడు ముఖ్య అతిథిగా హాజరయ్యారు. జాతీయ జెండాను ఆవిష్కరించారు. అనంతరం బెలూన్లను గాల్లోకి ఎగురవేశారు. 75 ఏళ్ల స్వతంత్రాన్ని పూర్తి చేసుకున్న వేళ సంబురాల్లో భాగంగా నిర్వహిస్తోన్న హర్ ఘర్ తిరంగా అద్భుతమైన కార్యక్రమం అని బాబు కొనియాడారు. రాబోయే మూడు రోజులు ప్రతి ఒక్కరూ తమ ఇంటిపై జాతీయ జెండాను ఎగురవేయాలని సూచించారు.
“మహనీయుల త్యాగాలతోనే స్వతంత్రం సిద్దించింది. స్వాతంత్య్ర ఉద్యమంలో గాంధీజీ రాజీలేని పోరాటం చేశారు. మహనీయులను స్ఫూర్తిగా తీసుకుని వారికి నివాళులు అర్పించాలి. స్వతంత్రం వచ్చిన తర్వాతే హరిత విప్లవం, క్షీర విప్లవం వచ్చింది. ఇప్పుడు ప్రపంచానికి తిండిపెట్టే స్థాయికి చేరుకున్నాం. దేశ ఆదాయాన్ని 8రెట్లు పెంచుకుని.. ప్రపంచంలో 6వ స్థానంలో నిలిచాం. కర్ఫ్యూలు ఉండే హైదరాబాద్ నుంచి కరోనాకు వ్యాక్సిన్ తయారుచేసే స్థాయికి చేరుకున్నాం. ఆర్థిక అసమానతలు లేని వ్యవస్థ రావాలి. అప్పుడే దేశానికి నిజమైన స్వాతంత్య్రం.” – చంద్రబాబునాయుడు, తెదేపా జాతీయ అధ్యక్షుడు
