తెలంగాణలో నాలుగు శాసన మండలి సభ్యుల పదవులను భర్తీ చేసేందుకు కాంగ్రెస్ పార్టీ కసరత్తు పూర్తి చేసింది. ఎమ్మెల్యే కోటా ఎమ్మెల్సీలు రెండు, గవర్నర్ కోటా రెండు ఎమ్మెల్సీ స్థానాలు భర్తీ చేసేందుకు అభ్యర్థులు ఎంపికపై కాంగ్రెస్ అధిష్టానం ఆమోదం తెలిపినట్లు సమాచారం. గవర్నర్ కోటా కింద తెలంగాణ జన సమితి అధ్యక్షుడు కోదండరాం, మరో మైనారిటీ నాయకుడిని పార్టీ అధిష్ఠానం ఎంపిక చేసినట్లు తెలిసింది.
పాడి కౌశిక్ రెడ్డి, కడియం శ్రీహరి ఎమ్మెల్యేగా గెలుపొంది ఎమ్మెల్సీ పదవికి రాజీనామా చేయడంతో ఆ రెండు స్థానాలు ఖాళీ అయ్యాయి. ఇందులో ఒకటి ఎస్సీ, మరొకటి ఓసీ వర్గానికి చెందిన స్థానం ఉండగా ఎస్సీ వర్గం నుంచి పీసీసీ ప్రధాన కార్యదర్శి అద్దంకి దయాకర్, ఓసీ స్థానానికి పీసీసీ వర్కింగ్ ప్రెసిడెంట్ మహేష్ కుమార్ గౌడ్ లేదా ఎన్ఎస్యూఐ రాష్ట్ర అధ్యక్షుడు బలమూరి వెంకట్, పటేల్ రమేష్ రెడ్డి, ప్రోటోకాల్ చైర్మన్ వేణుగోపాల్ రావు పేర్లు తెరపైకి వచ్చినట్లు తెలుస్తోంది. ఇవాళ ఎమ్మెల్యే కోటా ఎమ్మెల్సీ అభ్యర్థుల పేర్లను ప్రకటించే యోచనలో కాంగ్రెస్ వర్గాలు ఉన్నట్లు సమాచారం.
