మన ఇంట్లో చిన్న పిల్లలు ఉంటే రోజంతా వాళ్లను పిలుస్తూనే ఉంటాం. అయితే మన సనాతన ధర్మంలో పిల్లలకు రాముడు, కృష్ణుడు, శివుడు, లక్ష్మి, పార్వతి వంటి దేవుళ్ల పేర్లు పెట్టడం ఒక అనాదిగా వస్తున్న ఆచారం. కేవలం పేరు బాగుందని మాత్రమే కాదు.. దీని వెనుక భక్తి, సంస్కారం, దైవస్మరణ వంటి ఎన్నో గొప్ప భావనలు దాగున్నాయి. అసలు పిల్లలకు భగవంతుడి పేర్లు పెట్టడం వెనుక ఉన్న నమ్మకం ఏంటి? అలా పిలవడం వల్ల కలిగే పుణ్యం ఏంటో ఇప్పుడు సింపుల్గా తెలుసుకుందాం..
పెద్దలు యజ్ఞ యాగాలు చేయాలంటే ఎంతో ఖర్చు, భారీ ఏర్పాట్లు కావాలి. కానీ భగవంతుడి నామస్మరణకు పవిత్రమైన హృదయం ఉంటే చాలు. మన పిల్లలకు దేవుడి పేరు పెట్టి.. ‘రాముడు’, ‘కృష్ణుడు’ అని రోజులో వందసార్లు పిలిచినప్పుడు, మనకు తెలియకుండానే దేవుడి నామాన్ని జపించినట్లు అవుతుంది. దీనివల్ల ఆ ఇంట్లో నిరంతరం భగవంతుడి నామస్మరణ జరుగుతూ, ఇల్లంతా పవిత్రమైన శబ్దాలతో నిండిపోతుంది.
ఇక భగవంతుడి పేరును తెలిసి పలికినా, తెలియక పలికినా మనసు పవిత్రం అవుతుందని మన పురాణాలు చెబుతున్నాయి. దీనికి భాగవతంలోని ‘అజామిళుని కథ’ ఒక పెద్ద ఉదాహరణ. ఇక అజామిళుడు తన జీవితంలో ఎన్నో పాపాలు చేసినప్పటికీ, చనిపోయే చివరి నిమిషంలో తన కొడుకైన ‘నారాయణ’ను పిలిచాడు. కేవలం ఆ దేవుడి పేరును పలికినందుకే అతనికి విష్ణులోకం దక్కింది. అంటే భగవంతుడి నామానికి అంతటి శక్తి ఉందన్నమాట.
ఇక అసలు పిల్లలకు దేవుడి పేరు పెట్టడం అంటే కేవలం పిలవడం కోసమే కాదు, వాళ్లకు ఆ దేవతా గుణాలను అలరార్చడం కూడా. ఇక రాముడి పేరు పెడితే సత్యం-ధర్మం, కృష్ణుడి పేరు పెడితే జ్ఞానం-కరుణ, శివుడి పేరు పెడితే శాంతి-దయ, దుర్గ అనే పేరు పెడితే శక్తిని ఆ పిల్లలకు గుర్తుచేస్తూ పెంచాలి. ఉపనిషత్తులు, విష్ణు సహస్రనామం ప్రకారం భగవంతుని నామాలు కేవలం పేర్లు కావు, అవన్నీ దైవిక శక్తులు.
అంతేకాదు దేవుడి పేరు పెట్టడం వరకూ బాగానే ఉన్నా, కొన్ని జాగ్రత్తలు తప్పనిసరి. పిల్లలకు దేవుడి పేర్లు పెట్టినప్పుడు ఆ పేరును హేళనగా, కోపంతో తిట్టేందుకు అస్సలు ఉపయోగించకూడదు. ఇక ఒకవేళ పిల్లలను మందలించాల్సి వచ్చినా, అవమానకరంగా కాకుండా ప్రేమగా చెప్పాలి. పేరు అనేది ఒక మంచి విత్తనం లాంటిది. దానికి తల్లిదండ్రులు మంచి సంస్కారాన్ని జోడిస్తే ఆ పిల్లలు భవిష్యత్తులో ఉత్తమ వ్యక్తులుగా ఎదుగుతారు.
ఇక పిల్లలకు భగవంతుడి పేర్లు పెట్టడం అనేది మూఢనమ్మకం కాదు, దాని వెనుక ఎంతో ఆధ్యాత్మికమైన, శాస్త్రీయమైన ఆచారం ఉంది. బిడ్డను పిలిచినప్పుడల్లా దైవత్వాన్ని స్మరించుకుంటూ, వారికి మంచి సంస్కారాలను నేర్పించడం మన బాధ్యత.
గమనిక: పిల్లలకు దేవుళ్ల పేర్లు పెట్టినప్పుడు వాటిని రకరకాలుగా ముక్కలు చేసి, అర్థం లేని పేర్లతో పిలవడం కంటే.. పూర్తి పేరుతో గౌరవంగా పిలిస్తేనే ఆ నామస్మరణలోని అసలైన శక్తి, పుణ్యం మనకు దక్కుతాయి.
