ఇప్పుడు చిన్న,పెద్ద ఎవరైనా టమోటా లేనిదే ముద్ద దిగటం లేదు అంటే నిజం అనే అనాలి. మనం ఏ కూర వండినా అందులో టమోటా ఉండాల్సిందే. పప్పులో వేసినా, చారు చేసినా టమోటా ఇచ్చే రుచే వేరు. అయితే, గత కొంతకాలంగా టమోటాలు తింటే కిడ్నీలో రాళ్లు వస్తాయనే ప్రచారం జోరుగా సాగుతోంది. ఈ వార్త విన్నప్పటి నుంచి చాలామంది టమోటాలు వాడాలంటేనే భయపడుతున్నారు. మరి నిజంగానే టమోటా ప్రాణాంతకమా? కిడ్నీ రాళ్లకు, టమోటా విత్తనాలకు సంబంధం ఉందా? నిపుణులు ఏం చెబుతున్నారో ఇప్పుడు క్లియర్ గా తెలుసుకుందాం.
అసలు భయం ఎక్కడ మొదలైంది?: కిడ్నీలో ఏర్పడే రాళ్లలో ‘కాల్షియం ఆక్సలేట్’ రాళ్లు రకాలు ఎక్కువగా ఉంటాయి. టమోటాల్లో ‘ఆక్సలేట్’ అనే పదార్థం ఉంటుందని, అది కాల్షియంతో కలిసి రాళ్లుగా మారుతుందని చాలామంది నమ్ముతారు. ముఖ్యంగా టమోటా గింజలే ఈ రాళ్లకు కారణమని ప్రచారం జరుగుతోంది. ఇక దీంతో కిడ్నీ సమస్యలు ఉన్నవారు మాత్రమే కాదు, ఆరోగ్యంగా ఉన్నవారు కూడా టమోటాలను దూరం పెడుతున్నారు. కానీ, అసలు నిజం మనందరినీ ఆశ్చర్యపరుస్తుంది.
టమోటాలో ఆక్సలేట్ ఎంత ఉంటుంది?: వాస్తవానికి టమోటాల్లో ఆక్సలేట్ శాతం చాలా తక్కువగా ఉంటుంది. 100 గ్రాముల టమోటాల్లో కేవలం 5 నుండి 6 మిల్లీగ్రాముల ఆక్సలేట్ మాత్రమే ఉంటుంది. పాలకూర లేదా చాక్లెట్లు, బీట్రూట్ వంటి వాటితో పోలిస్తే ఇది చాలా స్వల్పం. కాబట్టి, మనం రోజూ కూరల్లో వేసుకునే టమోటాల వల్ల కిడ్నీలో రాళ్లు వచ్చే అవకాశం దాదాపు లేదని పరిశోధనలు చెబుతున్నాయి. కిడ్నీలు ఆరోగ్యంగా ఉన్నవారు భయపడాల్సిన అవసరమే లేదు.
గింజలు తీసేయాలా.. వద్దా?: ఇక చాలామంది టమోటా గింజలు తింటే అవి నేరుగా కిడ్నీలోకి వెళ్లి రాళ్లుగా మారుతాయని అనుకుంటారు. కానీ మన జీర్ణవ్యవస్థ అలా పని చేయదు. ఆహారం జీర్ణమయ్యాక రక్తం ద్వారా పోషకాలు కిడ్నీలకు చేరుతాయి. ఇక టమోటా గింజల వల్ల నేరుగా రాళ్లు రావు. అయితే, ఇప్పటికే కిడ్నీలో రాళ్ల సమస్యతో బాధపడుతున్న వారు లేదా డాక్టర్లు ప్రత్యేకంగా సూచించిన వారు మాత్రం గింజలు తీసి వాడటం మంచిది. సాధారణ వ్యక్తులకు ఇది అస్సలు అవసరం లేదు.
కిడ్నీ రాళ్లకు అసలు కారణాలు ఇవే: టమోటాల మీద పడి ఏడవడం కంటే, మన అలవాట్లు మార్చుకోవడం ముఖ్యం. తగినంత నీరు తాగకపోవడం, శరీరంలో నీటి శాతం తగ్గడం వల్ల కిడ్నీలో రాళ్లు ఏర్పడతాయి. అలాగే ఉప్పు ఎక్కువగా తినడం, జంక్ ఫుడ్, శీతల పానీయాలు తీసుకోవడం వల్ల రాళ్లు వచ్చే ప్రమాదం పెరుగుతుంది. ఇక కిడ్నీ రాళ్లకు టమోటాలు కారణం కావు, మన జీవనశైలి మరియు ఆహారపు అలవాట్లే ప్రధాన కారణమని వైద్యులు స్పష్టం చేస్తున్నారు.
టమోటాతో కలిగే ప్రయోజనాలు: టమోటాను దూరం పెడితే మనం ఎన్నో పోషకాలను కోల్పోతాం. ఇందులో ‘లైకోపీన్’ అనే శక్తివంతమైన యాంటీ ఆక్సిడెంట్ ఉంటుంది, ఇది గుండె ఆరోగ్యాన్ని మెరుగుపరుస్తుంది మరియు క్యాన్సర్ రాకుండా కాపాడుతుంది. ఇక విటమిన్ సి, పొటాషియం వంటివి పుష్కలంగా ఉండటం వల్ల రోగనిరోధక శక్తి పెరుగుతుంది. కిడ్నీ రాళ్ల భయంతో ఈ ఆరోగ్య ప్రయోజనాలను వదులుకోవడం తెలివైన పని కాదని నిపుణుల అభిప్రాయం.
గమనిక: పైన ఇచ్చిన సమాచారం కేవలం అవగాహన కోసం మాత్రమే, మీకు ఇప్పటికే కిడ్నీలో రాళ్లు ఉంటే, ఏ ఆహారం తీసుకోవాలి అనే విషయంలో మీ డాక్టర్ సలహా తీసుకోవడం ఉత్తమం.
