TSPSC క్వశ్చన్ పేపర్ లీకేజీ ఘటనలో సిట్ దర్యాప్తు ముమ్మరం చేసింది. ఇప్పటికే ఈ కేసులో డజనుకుపైగా నిందితులను అరెస్టు చేసింది. ముఖ్యంగా ఏఈ పేపర్ ఎంత మందికి లీక్ అయిందనే దానిపై సిట్ దర్యాప్తు కొనసాగుతోంది. ఈ కేసులో తాజాగా ముగ్గురు నిందితులను సిట్ కస్టడీలోకి తీసుకుంది. చంచల్‌గూడ జైళ్లో ఉన్న షమీమ్‌, రమేశ్‌, సురేశ్‌ను తీసుకువెళ్లిన పోలీసులు.. ముందుగా వైద్య పరీక్షలు జరిపించారు. అనంతరం, హిమాయత్‌నగర్‌లోని సిట్ కార్యాలయానికి వీరిని తరలించారు.
ఐదు రోజుల పాటు ఈ ముగ్గురు నిందితులను సిట్ అధికారులు విచారించనున్నారు. గ్రూప్‌ 1 ప్రిలిమినరీ పరీక్షలో దామెర రమేష్‌కుమార్‌కు 122 మార్కులు, షమీమ్‌కు 126, సురేష్ 100కు పైగా మార్కులు సాధించారు. సురేష్‌ను రాజశేఖర్‌రెడ్డికి స్నేహితుడిగా గుర్తించారు. వందకు పైగా మార్కులు తెచ్చుకున్న ఈ ముగ్గురూ లీకైన ప్రశ్నపత్రాల ద్వారానే సాధించినట్టు పోలీసులు నిర్ధారణకు వచ్చారు. క్వశ్చన్ పేపర్ ఎక్కడి నుంచి బయటికి వచ్చిందనే అంశాలతో పాటు ఇంకా ఎంత మందికి పంపించారనే కోణంలో పోలీసులు వీరిని విచారించే అవకాశం ఉంది.
