తేనె అనగానే మనందరికీ కేవలం ఒకే రకమైన తీపి ద్రవం గుర్తొస్తుంది. కానీ, తేనెలో కూడా ఎన్నో రకాలు, విభిన్నమైన రుచులు ఉన్నాయని మీకు తెలుసా? తేనెటీగలు ఏ పూల నుండి మకరందాన్ని సేకరిస్తాయనే దానిపైనే ఆ తేనె రంగు, రుచి, మరియు గుణాలు ఆధారపడి ఉంటాయి. ప్రపంచవ్యాప్తంగా విపరీతమైన క్రేజ్ ఉన్న కొన్ని అద్భుతమైన తేనె రకాలు, వాటి ప్రత్యేకతల గురించి ఇప్పుడు తెలుసుకుందాం..
తేనె రకాలు ఎలా మారుతాయి?: తేనెటీగలు వాలిన పూల తోటలను బట్టి తేనె రకం మారుతుంది. వాతావరణం, ఆయా ప్రాంతాల్లో పెరిగే చెట్లు, అలాగే తేనెను సేకరించి బాటిల్స్ లో ప్యాక్ చేసే (ప్రాసెసింగ్) విధానం కూడా దాని రుచిని, రంగును పూర్తిగా మార్చేస్తాయి.
లైట్ కలర్.. అకేసియా, క్లోవర్ తేనెలు: చాలా లేత రంగులో, స్వచ్ఛంగా కనిపించే ‘అకేసియా’ తేనెకు ప్రపంచవ్యాప్తంగా మంచి డిమాండ్ ఉంది. ఇది అంత తొందరగా గడ్డకట్టదు. ఇక ‘క్లోవర్’ అనే పూల నుండి వచ్చే తేనె చాలా మృదువుగా, తియ్యగా ఉండి అందరికీ త్వరగా నచ్చేస్తుంది.
మెడిసిన్ లాంటి మనూకా తేనె: ఔషధ గుణాల్లో ‘మనూకా తేనె’ టాప్ అని చెప్పవచ్చు. న్యూజిలాండ్లో దొరికే ఈ తేనెలో యాంటీబ్యాక్టీరియల్ గుణాలు చాలా ఎక్కువ. ఇక గాయాలను తగ్గించడానికి, గొంతు నొప్పిని నయం చేయడానికి మరియు రోగనిరోధక శక్తిని పెంచడానికి ఇది సూపర్బ్గా పనిచేస్తుంది.
గాఢమైన బక్వీట్, ఆరెంజ్ బ్లాసమ్: కొన్ని తేనెలు డార్క్ కలర్లో ఉంటాయి. అందులో ‘బక్వీట్’ తేనె ఒకటి. ఇది కొంచెం ఘాటుగా ఉండి, దగ్గుకు మంచి మందులా పనిచేస్తుంది. అలాగే ఇక నారింజ పూల నుండి సేకరించే ‘ఆరెంజ్ బ్లాసమ్’ తేనె తింటుంటే లైట్గా ఆరెంజ్ ఫ్లేవర్ వస్తూ భలే రుచిగా ఉంటుంది.
అన్నిటికంటే ముడి తేనే బెస్ట్: మార్కెట్లో దొరికే ఫిల్టర్ చేసిన తేనెల కంటే.. ఎటువంటి కెమికల్స్ కలపని, వేడి చేయని సహజమైన ‘ముడి తేనె’ (Raw Honey) ఆరోగ్యానికి ఎంతో మేలు చేస్తుంది. ఇక ఇందులో ఎన్నో రకాల ఎంజైమ్స్, విటమిన్లు అలాగే ఉండి శరీరానికి పూర్తి శక్తిని ఇస్తాయి.
ఇక ఇప్పుడు అర్థమైంది కదా.. తేనె అంటే కేవలం తీపి మాత్రమే కాదు, అదొక పెద్ద రుచుల ప్రపంచం! మీ ఆరోగ్య అవసరాలను బట్టి, మీకు నచ్చిన ఫ్లేవర్ను ఎంచుకుని రోజూ కొద్దిగా తేనెను తింటే డాక్టర్లకు దూరంగా ఉండొచ్చు.
గమనిక: మార్కెట్లో దొరికే నకిలీ తేనెలతో జాగ్రత్తగా ఉండండి. నమ్మకమైన చోట లేదా బ్రాండ్స్ నుండి మాత్రమే ముడి తేనెను కొనడానికి ప్రయత్నించండి. అలాగే ఏడాది లోపు వయసున్న చిన్న పిల్లలకు తేనెను అస్సలు తినిపించకూడదు.
