ఈ రోజుల్లో మిలీనియల్స్, జెన్-జీ యువత హెల్త్ విషయంలో చాలా అప్రమత్తంగా ఉంటున్నారు. ప్రోటీన్ ఫుడ్స్, ఇంటర్మిటెంట్ ఫాస్టింగ్ అంటూ డైట్ ప్లాన్స్ ఫాలో అవుతున్నారు. అయినా కూడా కిచెన్ క్యాబినెట్స్, హాస్టల్ రూమ్స్, ఆఫీస్ కాంటిన్స్లో ‘ఇన్స్టంట్ నూడుల్స్’ మాత్రం ఎప్పుడూ సిద్ధంగానే ఉంటున్నాయి. ఆరోగ్యానికి మంచిది కాదని తెలిసినా యువత వీటికి ఎందుకు అంతగా కనెక్ట్ అవుతోంది? దీని వెనకున్న అసలు కారణాలను మనం మాట్లాడుకునే సరళమైన భాషలో ఇక్కడ తెలుసుకుందాం.
హెల్త్ కాన్షియస్ పెరిగినా తగ్గని క్రేజ్: ప్రస్తుతం ఇండియాలో హెల్తీ ఫుడ్స్ తినాలనే స్పృహ గతంలో కంటే చాలా పెరిగింది. అయినప్పటికీ ఇన్స్టంట్ నూడుల్స్ మార్కెట్ ఏమాత్రం తగ్గడం లేదు. ఇక భారతదేశంలో దీని మార్కెట్ విలువ ప్రస్తుతం దాదాపు 1.8 బిలియన్ డాలర్లుగా ఉంది. మన సాంప్రదాయ మసాలా నూడుల్స్తో పాటు, సరికొత్త ప్రీమియం రకాలు, కొరియన్ స్టైల్ నూడుల్స్ కూడా ఇప్పుడు యువతను,పిల్లలు విపరీతంగా ఆకట్టుకుంటున్నాయి.
ఇన్స్టంట్ నూడుల్స్ బ్యాడ్ రిప్యుటేషన్: నిజానికి ఇన్స్టంట్ నూడుల్స్ అంత ఆరోగ్యకరమైనవి కావనేది అందరికీ తెలిసిన రహస్యమే. ఇవి గుండె జబ్బులు, హార్మోన్ల అసమతుల్యత, మరియు డిమెన్షియా వంటి సమస్యల ముప్పును పెంచుతాయని ఎప్పటికప్పుడు కొత్త పరిశోధనలు హెచ్చరిస్తూనే ఉన్నాయి.
నూడుల్స్ కాదు.. అదొక ఎమోషన్: చాలా మందికి ఇన్స్టంట్ నూడుల్స్ ముఖ్యంగా మ్యాగీ అనేవి కేవలం ఆహారం మాత్రమే కాదు, అదొక బలమైన ఎమోషన్. ఇక ఏదైనా హిల్ స్టేషన్కి ట్రిప్ వెళ్ళినప్పుడు అక్కడ ప్రకృతి అందాలను చూస్తూ వేడివేడి మ్యాగీ ప్లేట్ తింటే వచ్చే మజానే వేరు.
గుర్తొచ్చే మధురమైన జ్ఞాపకాలు: ఈ తరం యువతకు నూడుల్స్ ప్యాకెట్ చూడగానే ఎన్నో పాత జ్ఞాపకాలు గుర్తొస్తాయి. స్కూల్ నుంచి రాగానే అమ్మ చేసిపెట్టిన నూడుల్స్, కాలేజీ రోజుల్లో హాస్టల్ రూమ్స్, అర్ధరాత్రి ఆకలి వేసినప్పుడు ఫ్రెండ్స్తో కలిసి వండుకున్న క్షణాలు, రైలు ప్రయాణాలు.. ఇలా ఎన్నో విషయాలు దీనితో ముడిపడి ఉన్నాయి.
ఇక ఆరోగ్య సూత్రాలు, క్లీన్ ఈటింగ్ లాంటివి ఒకవైపు నడుస్తున్నా.. ఇన్స్టంట్ నూడుల్స్ ఇచ్చే తృప్తి, సౌకర్యం యువతను వీటికి దూరం చేయలేకపోతున్నాయి. ఇక బిజీ లైఫ్లో ఈజీగా తయారయ్యే ఫుడ్ కావడం, అలాగే పాత జ్ఞాపకాలతో కూడిన ఎమోషనల్ కనెక్ట్ ఉండటమే యువత దీనికి ఫిదా అవ్వడానికి అసలు కారణం. అయితే రుచితో పాటు ఆరోగ్యం కూడా ముఖ్యం కాబట్టి వీటిని ఎప్పుడో ఒకసారి పరిమితంగా ఎంజాయ్ చేయడం మంచిది.
