మాజీ ముఖ్య‌మంత్రి, స్వ‌ర్గీయ ఎన్‌టీ రామారావు జీవిత గాథ ఆధారంగా ఎన్‌టీఆర్ బ‌యోపిక్ తెర‌కెక్కుతున్న విష‌యం తెలిసిందే. మొద‌ట్లో ఈ చిత్రానికి తేజ ద‌ర్శ‌కుడిగా ప‌నిచేశారు. కానీ కొన్ని అనుకోని కార‌ణాల వ‌ల్ల తేజ తప్పుకోవ‌డంతో ఇప్పుడు ఆ చిత్రాన్ని క్రిష్ తెరకెక్కిస్తున్నారు. అయితే మ‌రోవైపు ప్ర‌ముఖ న‌టుడు మమ్ముట్టి ప్ర‌ధాన పాత్ర‌లో వైఎస్ఆర్ బ‌యోపిక్ యాత్ర కూడా నిర్మాణ‌మ‌వుతున్న విష‌యం తెలిసిందే. కాగా త్వ‌ర‌లో ఏపీ సీఎం చంద్రబాబు బ‌యోపిక్ కూడా విడుద‌ల కానుంది.
ఏపీ సీఎం చంద్రబాబు జీవిత గాథ ఆధారంగా చంద్రోద‌యం పేరిట బాబు బ‌యోపిక్‌ను తెరకెక్కిస్తున్నారు. ఈ చిత్రానికి వెంక‌ట ర‌మ‌ణ ద‌ర్శ‌క‌త్వం వ‌హిస్తుండ‌గా, జిజె రాజేంద్ర చిత్రాన్ని నిర్మిస్తున్నారు. చంద్ర‌బాబుగా వినోద్ నువ్వుల, ఎన్‌టీఆర్ గా భాస్క‌ర్ న‌టిస్తున్నారు. ఈ చిత్రానికి రాజ్ కుమార్ సంగీతం అందిస్తున్నారు. కాగా చంద్రోద‌యం ఫ‌స్ట్ లుక్ ను తాజాగా విడుద‌ల చేశారు. అక్టోబరు 18న చిత్రాన్ని ప్రేక్షకుల ముందుకు తీసుకురానున్నట్లు ద‌ర్శ‌క నిర్మాత‌లు తెలిపారు. ఈ క్ర‌మంలోనే సినిమా ప్రచార చిత్రంలో చంద్రబాబును చూపించారు.
ఇప్పటికే ఈ చిత్రం షూటింగ్‌ 80 శాతం పూర్తయినట్లు దర్శకుడు చెప్పారు. దేశచరిత్రలోనే ఒక అరుదైన, ఆదర్శవంతమైన నాయకుడు చంద్రబాబు నాయుడు. సామాన్య కుటుంబంలో జన్మించి, అగ్ర స్థానానికి ఎదిగిన ఆయన జీవితం అందరికీ తెలియాలనే ఈ చిత్రాన్ని తీస్తున్నాం. చంద్రబాబు చిన్ననాటి జీవితం నుంచి ఆయన రాజకీయ నాయకుడిగా ఎదిగిన క్రమాన్ని ఈ చిత్రంలో చూపించబోతున్నాం.. అని ఆయన పేర్కొన్నారు.
