ర్యాపిడో.. ఈ పేరు తెలియని వారుండరు. సొంత వాహనాలు లేని వారు.. ఎక్కడికైనా ఒక్కరే వెళ్లాలంటే క్యాబ్ను బుక్ చేసుకుంటారు. కానీ ఒక్కరి కోసం క్యాబ్ అనవసరం అనుకునే వారు ర్యాపిడో బైక్స్కు జై కొట్టేవారు. ఇండియాలో ర్యాపిడోను ఎక్కువగా యువకులే వినియోగిస్తున్నారు. అయితే ఇన్నాళ్లూ కేవలం బైక్ రైడ్స్ అందించిన ర్యాపిడో ఇప్పుడు తమ సేవలు విస్తరించాలని నిర్ణయించింది. ఈ నేపథ్యంలోనే క్యాబ్ సేవలు కూడా ప్రారంభించాలని నిర్ణయించింది.
అనుకున్నట్లుగానే ఇండియాలో ర్యాపిడ్ క్యాబ్ సేవల విభాగంలోకి అడుగుపెట్టింది. ఓలా, ఉబర్ వంటి సంస్థలతో ఇక నుంచి ర్యాపిడో కూడా పోటీ పడనుంది. దిల్లీ- ఎన్‌సీఆర్‌, హైదరాబాద్‌, బెంగళూరు నగరాల్లో దాదాపు 1.2 లక్షల క్యాబ్‌లతో సేవలు ప్రారంభించినట్లు ర్యాపిడో తెలిపింది. 2024 సెప్టెంబరుకు వీటిని 35 నగరాలకు విస్తరిస్తామని ఆ సంస్థ సహవ్యవస్థాపకుడు పవన్ గుంటుపల్లి వెల్లడించారు. ఎక్కువ మంది ప్రజలకు యాప్‌ ఆధారిత సేవలు అందించి, మార్కెట్‌ విస్తరించుకోవడమే తమ లక్ష్యమని పవన్ గుంటుపల్లి వివరించారు.
