రాజకీయ పార్టీపై కూడా పరువు నష్టం దావా వేయొచ్చని కర్ణాటక హైకోర్టు పేర్కొంది. కాంగ్రెస్ ఎమ్మెల్యే రిజ్వాన్ అర్షద్, బీజేపీపై వేసిన పరువు నష్టం కేసును కొట్టివేయడానికి ఉన్నత న్యాయస్థానం నిరాకరించింది. ప్రజాస్వామ్య వ్యవస్థలో రాజకీయ పార్టీలకు, ప్రజాప్రతినిధులకు తగిన రక్షణ అవసరమని, అందువల్ల పరువునష్టనం అంత తీవ్రమైన నేరం కానప్పటికీ, దాన్ని తేలికగా తీసుకోలేమని తెలిపింది. ఈ కేసులో తమ అభిప్రాయాలు, ప్రత్యేక కోర్టులో పెండింగ్లో ఉన్న పురువునష్టం కేసుపై ఎలాంటి ప్రభావం చూపబోవని స్పష్టం చేసింది.
ఈ కేసులో జస్టిస్ ఎస్ దీక్షిత్ ధర్మాసనం విచారణ చేపట్టగా.. భారతీయ శిక్షాస్మృతిలోని సెక్షన్లు 499, 500 ప్రకారం రాజకీయ పార్టీని వ్యక్తిగా పరిగణించలేమని బీజేపీ తరఫు న్యాయవాది వాదించారు. బీజేపీ వాదనపై రిజ్వాన్ తరఫు న్యాయవాది అభ్యంతరం వ్యక్తం చేస్తూ.. ఐపీసీ సెక్షన్ 11లో వ్యక్తిని నిర్వచించారని, పార్టీ కూడా చాలా మంది వ్యక్తులతో కూడిన సంస్థ అని పేర్కొన్నారు. ఇరువురి వాదనలు విన్న ధర్మాసనం బీజేపీ పిటిషన్ను కొట్టివేసింది.