తెలంగాణలో లోక్సభ ఎన్నికల పోలింగ్ ప్రశాంతంగా ముగిసింది. ఇన్నాళ్లూ ప్రచారాలతో బిజీబిజీగా గడిపిన నేతలంతా ఇప్పుడు కాస్త రిలాక్స్ అవుతున్నారు. కొందరు విదేశాలకు విహారయాత్రకు వెళ్లారు. మరికొందరేమో భారత్లోనే సేద తీరుతున్నారు. అయితే రాష్ట్ర కాంగ్రెస్ నేతల్లో కొందరు మాత్రం ఐదో దశ పోలింగ్ నేపథ్యంలో ఆయా రాష్ట్రాల ఎన్నికల ప్రచారంలో పాల్గొంటున్నారు.
పార్లమెంటు ఎన్నికల ప్రచారంలో భాగంగా డిప్యూటీ సీఎం భట్టి విక్రమార్క మల్లు మంగళవారం రాత్రి దిల్లీ బయలుదేరి వెళ్లారు. ఈరోజు రాహుల్ గాంధీతో కలిసి ఒడిశా రాష్ట్రంలోని బోలంగిర్ లోక్ సభ పరిధిలో ప్రచారం నిర్వహించనున్నారు. బుధవారం ఉదయం దిల్లీ నుంచి రాహుల్ గాంధీతో కలిసి ప్రత్యేక విమానంలో డిప్యూటీ సీఎం భట్టి విక్రమార్క బోలంగిర్ లోక్ సభ స్థానానికి చేరుకోనున్నారు. డిప్యూటీ సీఎం భట్టి విక్రమార్క ఇప్పటికే ఒడిశా రాష్ట్రంలో 3 దఫాలుగా ప్రచారం నిర్వహించారు. కటక్ లో ఒకరోజు, భువనేశ్వర్ లో రెండు రోజులపాటు, రాయగడ పార్లమెంటు పరిధిలో రెండు రోజులపాటు ఇప్పటికే ప్రచారం నిర్వహించారు. తాజాగా నాలుగోసారి ఒడిశా రాష్ట్రంలోని బోలంగిర్ పార్లమెంటు పరిధిలో ప్రచారంలో పాల్గొంటున్నారు.
