తెలంగాణలోని ప్రభుత్వ, ప్రైవేటు డిగ్రీ కళాశాలల్లో ప్రవేశాల కోసం డిగ్రీ ఆన్‌లైన్‌ సర్వీసెస్‌ తెలంగాణ (దోస్త్‌)లో విద్యార్థులు ఈ నెల 20వ తేదీ నుంచి వెబ్ ఆప్షన్లు ఇవ్వాలని ఉన్నత విద్యామండలి ఛైర్మన్‌ లింబాద్రి సూచించారు. ఈ నెల 30వ తేదీ వరకు గడువు ఉంటుందని తెలిపారు. గతంలో ఈ నెల 15వ తేదీ నుంచి 27వ తేదీ వరకు వెబ్ ఆప్షన్లు ఇవ్వాలని ప్రకటించామని… విద్యార్థులు, కళాశాలల యాజమాన్యాల వినతి మేరకు దాన్ని సవరించామని వెల్లడించారు. విద్యార్థులు ఈ విషయాన్ని గమనించి వెబ్ ఆప్షన్లు ఇచ్చుకోవాలని చెప్పారు.
మరోవైపు బీసీ స్టడీ సర్కిల్‌ ఆధ్వర్యంలో టీఎస్‌పీఎస్సీ గ్రూప్‌-1 ప్రిలిమ్స్‌, యూపీఎస్సీ సివిల్స్‌ ప్రిలిమ్స్‌ కోసం ఆఫ్‌లైన్‌ గ్రాండ్‌ టెస్టులను నిర్వహిస్తున్నట్లు స్టడీ సర్కిల్‌ డైరెక్టర్‌ శ్రీనివాస్‌రెడ్డి మంగళవారం తెలిపారు. రాష్ట్రంలోని 12 బీసీ స్టడీ సర్కిళ్లలో గ్రూప్‌-1 ప్రిలిమ్స్‌ ఆఫ్‌లైన్‌ గ్రాండ్‌ టెస్టులను ఈ నెల 18, 20, 22, 24, 25, 27, 29, 31, జూన్‌ 1, 3 తేదీల్లో నిర్వహించనున్నట్లు వెల్లడించారు.
