మీరు రోజుకు ఒకసారి తలస్నానం చేస్తారా? లేక రెండు రోజులకు ఒకసారి చేస్తారా? అసలు ఎంత తరచుగా తలస్నానం చేయాలనే విషయంలో ఎప్పుడైనా గందరగోళానికి గురయ్యారా? మనకు సౌకర్యంగా ఉన్నప్పుడు తలస్నానం చేస్తాం కానీ, జుట్టు నిపుణులు మాత్రం ఈ ఫ్రీక్వెన్సీ మన వయస్సుపైనే ఆధారపడి ఉంటుందని చెబుతున్నారు! తలస్నానం చేసే అలవాటుకూ, మీ వయస్సుకూ ఉన్న సంబంధం ఏంటి? నిపుణులు చెప్పిన ఆసక్తికరమైన నిజాలను తెలుసుకుందాం..
వయస్సుకు, తలస్నానం ఫ్రీక్వెన్సీకి సంబంధం: నిపుణుల అభిప్రాయం ప్రకారం, తలస్నానం ఫ్రీక్వెన్సీ అనేది ప్రధానంగా స్కాల్ప్లోని సెబమ్ ఉత్పత్తిపై ఆధారపడి ఉంటుంది. సెబమ్ ఉత్పత్తి మాత్రం వయస్సుతో పాటు మారుతుంది.
టీనేజర్స్, యవ్వనంలో (13-30 ఏళ్లు): ఈ దశలో హార్మోన్లు చాలా చురుకుగా ఉంటాయి. దీనివల్ల సెబమ్ ఉత్పత్తి గరిష్టంగా ఉంటుంది. అందుకే టీనేజర్లలో, యువకులలో స్కాల్ప్ త్వరగా జిడ్డుగా మారుతుంది. ఈ వయస్సు వారు తరచుగా (ప్రతిరోజూ లేదా రోజు విడిచి రోజు) తలస్నానం చేయడం అవసరం. ఇది మొటిమలు, చుండ్రు వంటి సమస్యలను నివారించడంలో సహాయపడుతుంది.
మధ్య వయస్సులో (30-50 ఏళ్లు): ఈ దశలో హార్మోన్ల స్థాయిలు కొంత స్థిరపడతాయి, సెబమ్ ఉత్పత్తి తగ్గుముఖం పడుతుంది. ఈ వయస్సులో ఉన్నవారు వారంలో 2-3 సార్లు తలస్నానం చేస్తే సరిపోతుంది. అతిగా తలస్నానం చేయడం వలన సహజ నూనెలు తొలగిపోయి, జుట్టు పొడిబారడం, చిట్లిపోవడం జరుగుతుంది.
వృద్ధాప్యంలో (50 ఏళ్లు దాటిన తర్వాత): ఈ దశలో సెబమ్ ఉత్పత్తి చాలా వరకు తగ్గిపోతుంది. చర్మం, స్కాల్ప్ మరింత పొడిగా మారుతాయి. అందుకే వీరు తక్కువ ఫ్రీక్వెన్సీతో (వారానికి 1-2 సార్లు) తలస్నానం చేయడం మంచిది. అతిగా తలస్నానం చేస్తే స్కాల్ప్ ఇరిటేషన్ పెరిగే అవకాశం ఉంది.
తలస్నానం ఫ్రీక్వెన్సీ కేవలం వయస్సుపైనే కాకుండా, కొన్ని ఇతర అంశాలపై కూడా ఆధారపడి ఉంటుంది అని తెలుసా.. అందులో ఒకటి జుట్టు రకం, జుట్టు సన్నగా, స్ట్రెయిట్గా ఉంటే త్వరగా జిడ్డుగా మారుతుంది కాబట్టి తరచుగా కడగాలి. కర్లీ, మందపాటి జుట్టు అయితే తక్కువ తరచుగా కడగవచ్చు.
వాతావరణం: వేసవిలో లేదా తేమ ఎక్కువగా ఉన్నప్పుడు చెమట, ధూళి పేరుకుపోవడం వలన తరచుగా తలస్నానం చేయాలి.
శారీరక శ్రమ: క్రమం తప్పకుండా వ్యాయామం చేసేవారు, లేదా హెల్మెట్ పెట్టుకునేవారు చెమట కారణంగా తరచుగా తలస్నానం చేయాల్సి వస్తుంది.
తలస్నానం ఫ్రీక్వెన్సీ అనేది మీ వయస్సు, హార్మోన్ల స్థాయిలు, జుట్టు రకంపై ఆధారపడి ఉంటుందని నిపుణులు స్పష్టం చేశారు. మీ జుట్టు ఎప్పుడు జిడ్డుగా, బరువెక్కినట్లు అనిపిస్తుందో గమనించుకుని, దానికి అనుగుణంగా తలస్నానం చేయడమే ఉత్తమ మార్గం. మీ జుట్టు అవసరాలను అర్థం చేసుకుని దానికి తగిన సంరక్షణను అందిద్దాం.
గమనిక: జుట్టు నిపుణుడు లేదా చర్మ వైద్యుడి సలహా లేకుండా తరచుగా షాంపూలు, కండీషనర్లు మార్చడం మంచిది కాదు. ఒకవేళ తరచుగా తలస్నానం చేసినా స్కాల్ప్లో దురద, మంట, లేదా తీవ్రమైన చుండ్రు వంటి సమస్యలు ఉంటే తప్పకుండా వైద్యుడిని సంప్రదించాలి.
