డయాబెటిస్.. నేడు ఇంటికొక్కరికి వినిపిస్తున్న పేరు. చక్కెర స్థాయిలను అదుపులో ఉంచుకోవడానికి ఏళ్ల తరబడి మందులు వాడుతూ విసిగిపోయిన వారికి మన వంటగదిలోనే ఒక అద్భుత పరిష్కారం దాగి ఉంది. అదే ‘మెంతులు’ ఇవి కేవలం రుచి కోసం కాకుండా రక్తంలోని గ్లూకోజ్ స్థాయిలను తగ్గించడంలో మెంతులు అద్భుతంగా పనిచేస్తాయని ఆధునిక పరిశోధనలు సైతం ధ్రువీకరిస్తున్నాయి. ప్రకృతి ప్రసాదించిన ఈ చిన్న గింజలు షుగర్ వ్యాధిగ్రస్తులకు ఎలా ‘ఇంటి మంత్రం’లా పనిచేస్తాయో ఇప్పుడు చూద్దాం.
మెంతుల్లోని మ్యాజిక్: శాస్త్రీయ కారణం: మెంతుల్లో పీచు పదార్థం (Fiber) మరియు ‘గెలాక్టోమన్నన్’ అనే మూలకం పుష్కలంగా ఉంటాయి. ఇవి మనం తిన్న ఆహారం నుంచి చక్కెర రక్తం లోకి త్వరగా చేరకుండా అడ్డుకుంటాయి. ఇక అలాగే, మెంతులు ఇన్సులిన్ ఉత్పత్తిని పెంచడంలో మరియు కణాలు ఇన్సులిన్ను సమర్థవంతంగా గ్రహించడంలో సహాయపడతాయి. అందుకే, మెంతులను నిత్యం వాడటం వల్ల రక్తంలోని హెచ్బీఏ1సీ, స్థాయిలు తగ్గుముఖం పడతాయని నిపుణులు చెబుతున్నారు.
ఎలా తీసుకుంటే ఫలితం ఉంటుంది?: మెంతులను తీసుకోవడానికి సరైన పద్ధతి వాటిని నీటిలో నానబెట్టడం. ఒక స్పూన్ మెంతులను రాత్రంతా గ్లాసు నీటిలో నానబెట్టి, మరుసటి రోజు ఉదయం ఖాళీ కడుపుతో ఆ నీటిని తాగి, నానిన మెంతులను నమిలి తినాలి. ఇక ఇలా క్రమం తప్పకుండా చేయడం వల్ల కొలెస్ట్రాల్ తగ్గడంతో పాటు చక్కెర స్థాయిలు అదుపులోకి వస్తాయి. ఒకవేళ నమిలి తినడం ఇష్టం లేని వారు మెంతులను పొడి చేసి కూరల్లో లేదా మజ్జిగలో కలిపి తీసుకోవచ్చు.
కేవలం షుగర్కే కాదు.. మరెన్నో లాభాలు: మెంతులు కేవలం డయాబెటిస్కే కాదు, జీర్ణక్రియను మెరుగుపరచడంలో కూడా కీలక పాత్ర పోషిస్తాయి. గుండె సంబంధిత సమస్యలను నివారించడంలో, బరువు తగ్గడంలో ఇవి తోడ్పడతాయి. ముఖ్యంగా అధిక బరువుతో బాధపడుతూ టైప్-2 డయాబెటిస్ వచ్చే అవకాశం ఉన్న వారికి మెంతులు ఒక రక్షణ కవచంలా పనిచేస్తాయి. మన పెరటి వైద్యంలో మెంతులకు అందుకే అంతటి ప్రాముఖ్యత ఉంది.
ఆరోగ్యం అనేది మనకు కిచెన్లో దొరికే చిన్న చిన్న పదార్థాలతోనే మొదలవుతుంది. మెంతులు డయాబెటిస్కు శాశ్వత పరిష్కారం కాకపోయినా అవి చక్కెర స్థాయిలను సమర్థవంతంగా నిర్వహించడంలో గొప్ప సహకారిగా నిలుస్తాయి. మంచి జీవనశైలి, వ్యాయామంతో పాటు ఈ ప్రకృతి సిద్ధమైన మందును వాడితే మధుమేహాన్ని మన దరి చేరకుండా చూసుకోవచ్చు.
గమనిక: ఈ సమాచారం కేవలం ప్రాథమిక అవగాహన కోసం మాత్రమే. మెంతులు రక్తంలోని చక్కెరను గణనీయంగా తగ్గిస్తాయి, కాబట్టి ఇప్పటికే మందులు వాడుతున్న వారు తమ డాక్టర్ని సంప్రదించి, వారి సూచనల మేరకే ఈ పద్ధతిని ప్రారంభించాలి.
