జిమ్లో గంటలు గంటలు కష్టపడుతున్నారా? అయినా బరువు తగ్గడం లేదా? అయితే సమస్య మీ వ్యాయామంలో కాదు, మీ రోజువారీ అలవాట్లలో ఉండొచ్చు. కేవలం ఎక్స్రసైజ్ మాత్రమే బరువును తగ్గించదు. మనం తినే ఆహారం నుండి పడుకునే సమయం వరకు అన్నీ పక్కాగా ఉన్నప్పుడే ఫలితం కనిపిస్తుంది. వ్యాయామం చేస్తున్నాం కదా అని ఏది పడితే అది తినేస్తే, మీ కష్టం అంతా బూడిదలో పోసిన పన్నీరే అవుతుంది. ఆ మార్పులేంటో ఇప్పుడు చూద్దాం..
వర్కవుట్ చేశాం కదా అని ఎక్కువ తినేస్తున్నారా?: చాలామంది చేసే అతిపెద్ద తప్పు ఇదే. పొద్దున్నే బాగా కష్టపడ్డాం కదా అని ఆకలి వేసినప్పుడు జంక్ ఫుడ్ లేదా స్వీట్లు లాగించేస్తుంటారు. మీరు 30 నిమిషాల రన్నింగ్లో ఖర్చు చేసే క్యాలరీలు, ఒక సమోసా లేదా కూల్ డ్రింక్ తాగితే మళ్ళీ ఒంట్లోకి వచ్చేస్తాయి. బరువు తగ్గడంలో 70% పాత్ర ఆహారానిదే, కేవలం 30% మాత్రమే వ్యాయామం. అందుకే మీరు ఎంత కష్టపడ్డా, పౌష్టికాహారం తీసుకోకపోతే బరువు తగ్గడం అసాధ్యం. వర్కవుట్ తర్వాత ప్రోటీన్ ఉండే ఆహారం తీసుకోవడం అలవాటు చేసుకోండి.
స్ట్రెస్ మరియు నీరు తాగకపోవడం: ఎప్పుడూ ఏదో ఒక విషయంలో టెన్షన్ పడుతుంటే శరీరంలో ‘కార్టిసోల్’ అనే స్ట్రెస్ హార్మోన్ విడుదలవుతుంది. ఇది నేరుగా మీ పొట్ట చుట్టూ కొవ్వు పేరుకుపోయేలా చేస్తుంది. అలాగే, రోజంతా సరిపడా నీరు తాగకపోవడం వల్ల మెటబాలిజం మందగిస్తుంది. ఒక్కోసారి మనకు దాహం వేసినప్పుడు అది ఆకలి అనుకుని ఏదో ఒకటి తినేస్తుంటాం. అందుకే ప్రతి గంటకు ఒక గ్లాసు నీరు తాగడం వల్ల శరీరం లోపల క్లీన్ అవ్వడమే కాకుండా అనవసరమైన ఆకలి కూడా కలగదు.
కూర్చుని ఉండే జీవనశైలి మార్చుకోండి: జిమ్లో ఒక గంట కష్టపడి, మిగతా 23 గంటలు సోఫాలోనో, కుర్చీలోనో కూర్చుని ఉంటే పెద్దగా లాభం ఉండదు. దీనినే ‘సెడెంటరీ లైఫ్ స్టైల్’ అంటారు. ఆఫీసులో ఉన్నా సరే, ప్రతి గంటకు ఒకసారి లేచి ఐదు నిమిషాలు నడవండి. లిఫ్ట్కు బదులు మెట్లు వాడండి. ఇలా చిన్న చిన్న పనులు చేస్తూ శరీరాన్ని యాక్టివ్గా ఉంచడం వల్ల బాడీలోని క్యాలరీలు నిరంతరం ఖర్చవుతూ ఉంటాయి. గుర్తుంచుకోండి, బరువు తగ్గడం అనేది ఒక ప్రయాణం అది కేవలం జిమ్ సెంటర్తో ముగిసిపోదు.
బరువు తగ్గడం అనేది కేవలం రూపానికి సంబంధించిన విషయం కాదు, అది మీ ఆరోగ్యం. క్రమశిక్షణతో కూడిన ఆహారం, సరైన నిద్ర, ప్రశాంతమైన మనస్సు.. ఇవన్నీ తోడైనప్పుడే మీ ఎక్స్రసైజ్కు ఫలితం లభిస్తుంది.